Tur hende ta na altura cu e situacion di COVID-19 aki na Aruba a trece cu ne cu hopi circunstancianan mester a cambia abruptamente. Hendenan no tabata kier sali for di nan cas pa asina no mester tin contacto cu posibel contagio. A para cierto plannan of haci cambio. Esaki a conta tambe pa esnan di Enseñansa pa Empleo (EPE). Hustamente debi na e situacionnan aki mester a para algun di e cursonan.
Despues di ahuste pa cu e cursonan cu mester a duna awo a yega e momento cu a finalisa tur rekisito y cursonan di agricultura/horticultura basico ta continua na Departamento di Agricultura, Cria y Pesca Santa Rosa conhuntamente cu Enseñansa pa Empleo. Esaki ta bay a base di e peticionnan grandi cu tin pa e curso specifico aki.
Por aprecia cu mas y mas persona ta keda cu e interes pa participa den cursonan manera di agricultura basico. E curso ta tuma luga riba dialuna cu ta teoria y les practico ta na Santa Rosa riba diasabra mainta trempan. Ludwig Rasmijn di Santa Rosa ta encarga cu e curso aki. Cursonan tin un duracion entre 2 pa tres ora. A limita e cursistanan tambe na cantidad pa asina mantene na reglanan di COVID-19
Manera por wordo admira y aprecia riba nos potretnan esaki ta riba un diasabra mainta y tambe e curso practico riba dialuna anochi aki na Santa Rosa. Curso ta finalisa mas o menos den e prome siman di november.
Santa Rosa ta gradici tur esnan cu tin interes den e curso aki pa motibo cu e por ta un guia pa asina bo mes por cuminsa produci productonan fresco na cas pa bo mesun consumo y hiba un calidad di bida mas saludabel.
