Cabes di e directornan di WEB ta colga na un hilo

Ta parce cu e siguiente dianan lo ta crucial pa e futuro di Luis Oduber y Randolph Ruiz, cu ta respectivamente e Chief Executive Officer y e Chief Financial Officer di Water en Energie Bedrijf (WEB) NV. Ambos ta invita pa un reunion cu e doño di WEB, esta Utilities Aruba NV. Por lo menos Oduber mester atende e reunion dia 22 di juli proximo. Diahuebs ultimo ambos director a haya e carta aki, cu invitacion pa nan atende un Algemene Vergadering van Aandeelhouders (AVA).

E motibo dicon kier kita e dos directornan aki awor no ta conoci. Locual si nos sa ta cu for di masha tempo caba, for di Utilities Aruba NV tabata sinti e necesidad pa manda ambos director di WEB Aruba NV cas. E tempo aya e director di Utilities Aruba, Richard Eman, a bisa di ta consciente cu si e kita Luis Oduber, cu gobierno lo cay. E tabata tene na cuenta cu Luis Oduber ta ruman homber mayo di Otmar Oduber, cu tabata partner den coalicion MEP-POR-RED. Pero awor cu Oduber ta for di politica y POR no tin asiento mas, mesora a mira e necesidad pa sigui cu e plan pa cambia gerencia di WEB.

Firma cu Quanten of bay cas

Internamente a bisa nos cu e disputa actual no tin nada di haber cu e ultimo blackout, sino mas bien cu un diferencia di opinion entre e director di WEB y Richard Eman di Utilities Aruba NV. Parce cu e ultimo aki kier forsa nan pa firma un acuerdo cu e compania Quanten Consortium Aruba. E ultimo aki, cu ta masha yega na e gobierno actual, no por haya fiansa ainda pa haci nada na e refineria. Pa por haya un fiansa, nan mester un contract cu WEB pa cumpra gas exclusivamente for di nan.

Ambos director di WEB no ta mira necesidad pa traha cu Quantem, un compania cu no tin ni placa ni experiencia y ta batiendo tur porta na Aruba pa purba haya un “bridge loan” pa yega na e contract cu Gobierno of WEB pa e ora ey por haya un fiansa mas grandi internacionalmente.

A core cu director di Utilities, di ELMAR y RdA caba

For di yegada di Eman na poder den Utilities Aruba NV el a demostra di no tin confiansa den gerencia di WEB. E no tabatin den Elmar tampoco y ey a core cu e director cu un “golden handshake”. No tabata basta y a core cu e director di Utilities Aruba mes, Franklin Hoevertsz, tambe cu un “golden handshake”. Y na RdA, Alvin Koolman a bay su mes, prome cu atende e reunion den cual nan lo a suspende pa kit’e fo’i trabou. Ta WEB so a keda falta y awo cu MEP ta sigui na poder, a dicidi di cuminsa cu core cu e dos directornan na WEB.

Golden Handshake ta costa pueblo placa

Riba nos pregunta, si no tin motibo urgente ni valido pa Corte, cuanto lo costa pa core cu un director asina. E contesta cu nos a haya ta cu nada baou di 250 mil florin. Specialmente esun di Luis Oduber lo ta halto pasobra e tin 20 aña di servicio caba na WEB. Esun di Ruiz lo ta menos pasobra ta na 2016 el a drenta na WEB y riba dje tin varios rapport caba pa su maneho financiero den e compania.

Tocante Luis Oduber

Luis Oduber (55) no ta un desconoci den e compania. El a cuminsa traha na WEB Aruba N.V. desde aña 2001 y su funcion tabata “Sector Manager Onderhoud”. Cu un bon conocemento den tur aspecto tecnico y di mantenemento, e accionista di WEB Aruba N.V., esta Utilities Aruba N.V. tabata totalmente convenci cu e lo por a sigui guia e compania na e siguiente nivel di crecemento, desaroyo y di innovacion. Desde dia 1 di januari 2016 a nombr’e den funcion di Director General. El a bira Chief Operations Officer (COO), mientras a nombra Randolph Ruiz como e Chief Financial Officer (CFO) y a opta pa nombra un di nan como Chief Executive Officer (CEO) tambe. Den caso di Luis Oduber, a asigna dos funcion pe, esta e COO y alavez e CEO.

Tocante Randolph Ruiz

Desde dia 1 di october 2016 a nombra Randolph Anthony Ruiz como “Chief Financial Officer” (CFO) di WEB Aruba N.V. E tarea principal como CFO ta encera duna guia na sectornan manera “Financieel en Economische Zaken” (FEZ), “Water Distributie en Customer Service” (WD&CS) y e departamentonan di “Enterprise Risk Management” (ERM), “ICT” como tambe Secretariado di Gerencia.

Randolph Ruiz (55) a obtene su “Masters” den Accounting na aña 1996 na St. Thomas University na Miami. E tin amplio experiencia den mundo financiero y a traha den diferente sector, entre otro como “Senior Audit Manager” na Ernst & Young Aruba y “Financial Director” na Tierra Del Sol. 

Tocante WEB Aruba NV

Water- en Energiebedrijf Aruba (WEB) ta existi pa 89 aña caba y tin mas o menos 350 empleado den servicio directo. Aruba a cuminsa desalina awa di lama desde aña 1903. Na aña 1932 a funda Landswatervoorziening. Desde e tempo ey te aña 2007, Aruba tabata produci awa destila. Na aña 1958 a cuminsa combina produccion di awa y coriente. Na aña 1983 a instala e prome facilidad di Reverse Osmosis. WEB a bira un compania independiente bou di Utilities Aruba NV na januari 1992. Na aña 2004 a desaroya Wind Park Vader Piet y a bay den funcion 5 aña despues. Na aña 2006 a cuminsa uza e prome tres mashinnan “Reciprocating Internal Combustion Engines”, conoci como RECIPs cu un capacidad di 24 Megawatt di produccion di coriente. Na Maart 2008 a introduci e unidad di produccion di awa di 8000 m3 pa dia, SWRO.