Esaki ta un siman masha excitante pa loke ta Aruba Caiso & Soca Monarch 2020. Stichting Musica ta informa cu carchinan di entrada pa ACSM2020 ta na benta awor na Citgo Boulevard, Citgo Palm Beach, Citgo Ponton, Citgo Santa Cruz y Citgo Essoville.
Ta posibel pa cumpra carchi pa cada anochi separa na balor di 25 florin pa cada anochi di Prefinals y tambe pa e Caiso Finals y Super Saturday Soca Finals na balor di 50 florin pa cada un.
Sinembargo, e recomendacion ta pa cumpra e package na prijs special di Afl 85 cu entrada pa tur 5 anochi di e festival.
Diaranson awor, 22 di januari 2020, e participantenan na ACSM2020 lo ta conoci. For di 7’or di anochi bandanan y participantenan ta invita pa “Meet The Press” na Centro di Bario Brazil.
Na final di e anochi aki lo tira lot pa revela e line-up di Prefinals.
Tur lidernan di banda ta na altura cu mester entrega formulario di registracion, band list completo, letra y tur otro rekisito na tempo pa asina sigura un proceso lihe y corecto. Stichting Musica ta gradici tur lidernan di banda cu ya caba a entrega nan documentonan via e-mail y ta brinda e ultimo
oportunidad pa inscribi riba diaranson, 22 di januari na Centro di Bario Brazil.
Manera ta custumber, ta anticipa cu tur banda lo yega e anochi di registracion final yen di buya y den forma creativo. Durante di e anochi aki lo tira lot pa Festival di Tumba tambe pa asina facilita e schedule di e bandanan ya cu mayoria ta participa na ambos festival.
Varios radio emisora y medio di prensa lo cubri e evento di registracion “live”.
Publico en general ta bonbini pa asisti e evento aki na CBB of pa sigui e desaroyo via nan medio preferi.
E resultado oficial di e registracion lo wordo publica riba e Facebook page di Stichting Musica despues di haci un control final.
Probecha y cumpra bo pakete pa drenta Aruba Carnival & Entertainment Village desde dia 27 di januari te cu dia 1 di februari. Aruba Caiso & Soca Monarch 2020 ta cla pa ranca sali!
