DIMAS a bin cu un sistema nobo pa cierto maneho cu tin eynan. Aña a habri y tin cambio. Segun directora Kathy Ruiz-Paskel, comienso di december ya a anuncia hunto cu Departamento di Impuesto cu lo bay tin algun cambio.
A stipula un periodo di transicion di un luna y na januari a recorda clientenan di e cambio. E cambio aki ta relata na con clientenan por haci un pago pa e diferente producto of servicionan cu tin na DIMAS.
Entrante di 15 di januari, un cliente di DIMAS cu kier haci uzo di nan servicio. ta haci su cita online. E ta bin riba dia di su cita na DIMAS y eynan lo dun’e un betalingsopdracht y cu esey e por haci su pago, sea si e tin cuenta di Aruba Bank via billpayment, si e tin cuenta di Banco di Caribe via billpayment y clientenan cu no ta cliente na un di e dos banconan ey, por acudi e ora na un MFA.
Por medio di debit card por cancela e sumanan cu ta coresponde, sea cu ta leges, retributie y waarborgsom.
Den billpayment ta drenta, bay na e parti di transfer, drenta den bo buki pa busca DIMAS. Eynan ta haya DIMAS Leges, DIMAS Retributie y DIMAS waarborgsom. Eynan ta importante pa bo tin bo payment order na man, pasobra e ta rekeri tambe cu bo ta yena bo number di cliente, CRV.
Fuera di esey e number di paymentorder y haci e pagonan corespondiente. Despues cu e cliente haci su pago, e no mester acudi bek na DIMAS. E sistemanan mes ta conecta y lo haya e respondi via digital cu e pago ta realisa dentro di shete dia. E ora DIMAS lo sigui cu e procedura di e peticion.
Un cambio necesario
DIMAS ta den un fase transitorio. Esaki no ta e unico cambionan cu lo conoce e aña aki. Ta preparando pa implementa un website unda cu e clientenan siguientemente por entrega documentonan por medio digital.
Esey no ta full cla ainda. Mientras tanto, DIMP y DIMAS a stipula cu lo bay fase pa fase y esaki ta e prome fase.
Costo
Kathy Ruiz-Paskel a splica cu DIMAS desde algun aña caba ta trahando cu un sistema nobo. Solamente cu no ta haciendo uzo di tur e funcion of sistemanan ainda. Un funcionalidad cu ainda no ta on ta e website. Esaki ta trahando desde aña pasa duro riba dje.
Ta poniendo e puntonan final. Ta spera cu dentro di poco, den prome kwartaal, por anuncia esaki tambe.
Pa loke ta sistema di pago, e ta pas tambe den e maneho di gobierno unda cu ta bayendo den un cashless economy, unda cu ta tuma pago, pero na un manera mas sigur. Sea cu bo ta haci’e online, pasobra ta sumanan relativamente halto. Of si bo no ta cliente den e caso aki ni di Aruba Bank ni Banco di Caribe, bo por swipe loke bo debe pa loke ta e servicio, na un di e MFAnan full rond di Aruba.
Servicio na cliente
Esaki ta un servicio cu lo ta dunando na e clientenan. Claro cu ta bay mantene e parti di servicio di cliente habri. Clientenan por ehempel cu no tin un email adres, lo bira hopi importante den e proceso aki, pa nan por tin nan propio email.
Pa menciona, ora cu haci entrega tur cos, bo comprobante di entrega y betalingsopdracht, lo ta manda na bo email personal.
Ta importante pa tur hende tin esaki na ordo pa asina DIMAS por keda comunica cubo y informabo di bo peticion, for di comienso te final.
