E team di Compra y Aruba Wine & Dine tabata presente na Cas di Cuido na San Nicolas den oranan di mainta pa treat e clientenan di Centro di Cuido un desayuno completo.
Ana Maria Ramirez, di Sales & Marketing, tabata presente na e evento aki y a splica cu e ta un iniciativa cu nan a cuminsa cun’e aña pasa. A saca e grandi pa desayuna biaha pasa, pero mirando cu hopi di e pashentnan ta na cama, a dicidi pa yega cerca nan y ofrece nan e desayuno special.
Loke cu el a constata ta cu e e grandinan ta gusta e tipo di bishitanan aki, pa cual ta encurasha otronan pa tuma un tiki di tempo y dedica esaki na e grandi. Na mesun momento a haci entrega di calender nobo di Compra na e clientenan di Centro di Cuido San Nicolas.
Yvonne Geerman Tromp, kende ta e persona cu ta guia e actividadnan di e grandinan, a compaña representantenan di Compra y Aruba Wine & Dine e mainta aki, cu a resulta uno sumamente agradabel. “E tabata un mainta hopi ameno y e grandinan tabata hopi entusiasma. For di tempran nan tabata sinta wardando riba e desayuno special aki, cu a saca nan for di nan rutina.”
Na e centro aki tin 60 persona cu mester di cuido special. Nan ta hiba un bida rutinario, pa cual e tipo di actividadnan aki manera esun di Compra y Aruba Wine & Dine ta algo cu tur eynan, hasta esnan cu ta cuida nan, ta aprecia esaki masha hopi.
E alegria aki por mira riba cara di Viola Cijntje, kende ta un di e grandinan presente, a gradici masha hopi pa e desayuno. El a crea un ambiente diferente y e gesto aki ta algo cu e ta aprecia. “Nos a come bon tambe, fruta dushi,” e cliente a expresa.