Luna di januari a yega y e preocupacion di principalmente e fundacionnan a keda ilustra un biaha mas pa motibo di incertidumbre riba pago di Bashi-Premie. Gobierno a bisa cu e ta paga su empleadonan e compensacion aki, pero e problema ta sinta awo den e fundacionnan subsidia door di gobierno cu semper a haya e placa aki, den e suma di subsidio.
SEPPA ta admiti cu e asunto di Bashi-Premie ta un preocupacion na diferente fundacion cualnan tambe a mira nan suma di subsidio reduci cu 12.5% cual tin su efecto riba tur nan gastonan. E fundacionnan ta haya nan mes den diferente ehercicio pa wak con ta cumpli cu e obligacionnan aki. Magaly Brito, secretario general di SEPPA, a splica cu e Bashi-Premie no ta algo di awo.
E pregunta ta si e 12.5% ta sigui cu ne den 2021, ta sigui manera gobierno a ehecut’e of ta uza un otro formula. Manera ta conoci caba, tin algun stichting cu a hacie di otro forma, pero na final ta yega cu a entrega 12.6%.
Loke doñonan di trabou mester compronde ta cu e trahadonan tin un derecho “y no ta sin mas por dicidi riba esaki”, Brito a bisa. Den e caso di SABA a palabra pa duna informacion na empleadonan y pone tur opcion riba mesa y laga e empleadonan dicidi. “Na final ta su cartera y e sa unda e ta preta mas y esaki ta mira tur otro caminda. Si dunado di trabou no ta sinta na mesa atende cu e asunto aki, bo ta bay haya tur sorto mensahenan di malcontento, accionnan di protesta cu por a evita.”
Por corda cu na 2017 gobierno a introduci “output subsidie”, y esaki ta encera cu ta duna e fundacion un suma di placa y gerencia di e fundacion mester mira con ta atende cu esaki, kico ta paga y kico no ta paga. “Pero mester respeta cu na diferente di e fundacionnan aki tin contracto di trabou y mester respeta e contracto aki. P’esey na SABA nan ta pidi pa respet’e. Y si kier haci algo cu esaki den cuadro di e 12.6% di reduccion, ta na mesa mester sinta y discuti con ta bay ehecuta esaki. Y no sin mas un dunado di trabou por bisa cu e ta bay kita cierto cosnan. E ta bay e ora di un forma unilateral cu no ta e forma corecto. E mensahe cu ta creando tras di e “output subsidie” ta manera cu e dunado di trabou por dicidi riba su mes di ki forma e ta bay ehecuta esaki. Esey ta un forma incorecto.”
