Den un partido preta, Brasil no por a supera Suisa den su estreno den e Copa di Mundo di Rusia 2018. E bentaha pa e muchanan di Tite a bin di parti di Coutinho den e di 20 minuut di e prome tempo, cu a haci cu e cariocanan perde nan ritmo y y asina nan a bay pa e tempo di descanso.
Brasil no tabata e ekipo manera cu e tabata den e eliminatorionan. Despues di descanso, nan a falta concentracion y den e di 10 minuut di e di dos parti, e Suiso Steven Zuber, tras di un centro desde e tiro di skina di parti di Xherdan Shaquiri, a haci su hugada. Den e di dos mita, e Brasileñonan a purba den tur forma, pero e gol no a yega. Tite a manda Roberto Firmino pa campo, como substituto di Gabriel Jesus, pero e figura di Liverpool no por a marca e bentaha den e dos opcionnan cla cu e tabata tin dilanti di e porta di gol di Yann Sommer.
Brasil sin e claridad di Neymar a perde su briyo. E hungado di PSG, kende a bin di un lesion for di Februari, no por a brinda e miho di su futbol pa duna un miho start pa su pais na Rusia. Di otro manera, e dirigidonan pa e Bosnio Vladimir Petkovic, a sa di contraresta e embestida pa e pentacampeonnan den e ultimo minuutnan.
Na final den un empate cu e laga e Brasileño y Suisonan patras di Serbia, kende a gana Costa Rica diadomingo mainta (1-0). E Europeonan a bin comanda cu tres punto e Grupo E, sigui pa un unidad di parti di Brasil y Suiza.
E proximo salida pa e Verdeamarela, lo ta diaberna dia 22 di Juni pa 8’or di mainta contra Costa Rica, mientras cu Suisa lo haci’e riba e mesun dia pa 2’or di merdia, contra Serbia.
Otro weganan
Pa loke ta e otro partidonan nos ta haya Suecia y Republica di Corea, cu lo enfrenta otro pa e Grupo F, 8’or di mainta den Nizhny Novgorod Stadium, na Nizhni Novgorod. Sigui pa 11’or di mainta unda cu Belgica lo enfrenta Panama pa Grupo G, den Fisht Stadium na Sochi y finalmente pa Grupo G, Tunesia lo enfrenta Inglatera pa 2’or di merdia den Volgograd Arena, na Volgograd.
Foto: FIFAⓒ
