Un caso lamentabel a tuma luga diasabra anochi lat na un compleho di apartament na Kudawecha. Na grito y panico, tres menor di edad a yega cas di bisiña na careda pa pidi auxilio pasobra nan mama ta hayando un bati formal den cas na man di un abusado.
Informacion cu a haya na sitio ta indica cu for di tempran e pareha lo tabata den un fiesta bon anima cu bochincha y alcohol envolvi. E tres yiunan presente cu ta cay den edad di 12, 14 y 17 tabata testigo di tur locual tabata tumando luga te na momento cu situacion a escala y bay totalmente for di man.
No ta conoci motibo pero locual ta sigur cu e dama lo a ricibi golpi formal di su pareha. Un abuso fisico condenabel, sin conta riba e trauma emocional cu e muchanan a pasa aden.
Por a compronde for di e bisiña cu e menornan a yega sustia y desespera buscando ayudo mirando con tabata bati nan mama malamente. Tambe a haya informacion cu slachtofferhulp a presenta na sitio pa asisti e menornan y e victima.
Mester bisa tambe cu e menornan no lo por a keda cu e mama despues di e maltrato mirando cu e mama tambe ta bou influencia y no por ocupa su mes di nan den e estado ey.
A detene e agresor na sitio y transport’e pa Warda di Polis pa e responde pa su acto.
