James Kroon, diputado encarga cu e area social y deporte, tabata presente na e celebracion di e edificio di Queen Clarita Quality Food Products by Clara’s Ranch. E edificio a yega su punto di mas halto. Gobierno su idea, algun aña pasa, tabata pa cualkier persona individual por haya un parti riba e tereno LVV (cu ta manera Santa Rosa) pa huur y pa asina nan por produci. Den caso di Eric Curiel, e ta produci carni pero tin varios otro persona cu ta produci algun otro berdura. Cu tipo di accion asina gobierno ta duna e balor agrega cu nan kier mira.
N’e momento aki, diputado Hennyson Thielman ta esun encarga cu e area di LVV y e a sigui cu e mesun pensamento di e gobierno anterior. James Kroon a enfatisa cu gobierno lo sigui duna sosten na tur hende cu kier sigui cu e tipo di actividad aki. Si e persona tin interes e mester djis tuma contacto cu LVV p’asina por registra nan y sigui cu e proceso.
Produccion propio
Produccion propio di cuminda a bira esencial durante pandemia. James Kroon a comenta cu despues di pandemia esaki a bira mas visibel mirando cu cada persona a bira mas consciente. Sea ta na cas of scol, tur hende ta papiando di cultiva cuminda.
Un oportunidad
Hennyson Thielman, ta e actual diputado encarga cu LVV, el a comenta cu recientemente a lansa un proyecto nobo. Riba e tereno di LVV tin mas cu 50 hectar y e idea ta pa duna diferente compania y cunukero e oportunidad pa haya un pida tereno. Tin algun a desaroya lechuga y algun ta cria bestia. Tin varios otro proyecto andando riba e tereno aki cu ta duna e cunukeronan un oportunidad. Gobierno ta mira e sector aki como uno interesante cu por trece beneficio economico pa Boneiro. Den pasado, Boneiro tabata un isla reconoci pa su agricultura pero cu tempo el a bira menos. Gobierno kier duna e cunukeronan loke nan mester pa haci esaki como un profesion serio.
E retonan
Tin hopi reto y esun di mas grandi ta e disponibilidad di awa. Ta conoci cu islanan no ta haya masha awasero, pues esey ta pone cu nan ta depende di otro fuente di awa. Awo Gobierno ta trahando hunto cu WEB pa haci destilacion di awa pa por uza esaki bek por ehempel pa muha mata. E area di agricultura mes no ta uno facil, tin reto manera parha cu ta come e frutanan. Gobierno kier pone un subsidio disponibel pa tur cu ta den e sector aki.
