Diaranson dia 23 di augustus 2023, den presencia di henter e ekipo, famia y amigo, a promove Professor Chris Arends pa di tres dan faha preto den e arte marcial popularmente conoci como Brazilian Jiu-Jitsu. Maestro Augusto Ferrari, cu ta un faha preto cuatro dan den e deporte di Jiu-Jitsu, a entrega Chris e gran logro aki. Augusto Ferrari, coach principal di e prestigioso academia New School Brotherhood residencia na Sao Paulo, Brazil pa varios aña ta frecuenta e isla di Aruba. E bishita di Augusto Ferrari cada bes sigur ta fortalece e ekipo y tambe un momento pa intercambia idea, comparti y siña tecnica nobo.
Chris Arends su trayectorio den arte di Jiu-Jitsu a cuminsa 20 aña pasa na Den Haag, Hulanda unda cu el a cuminsa practica e deporte na aña 2003. Na aña 2010 el a regresa bek Aruba for di Hulanda y a inaugura Team Agua Aruba. Team Agua Aruba a inicia su lesnan na Club Universal Pos Chikito. E ultimo ocho añanan Team Agua a continua cu su lesnan na Club Estrella Santa Cruz te na e momento aki cu a muda pa un localidad nobo.
Diasabra dia 26 di augustus 2023, a tuma luga un seminario duna pa Augusto Ferrari, sigui pa e ceremonia di graduacion di e ekipo. Aki ta unda Professor Chris Arends hunto cu amigo y compañero di training Abdullah Al-Omari (dos dan faha preto) y maestro Augusto Ferrari tabatin e honor di promove Darren (Darrinho) Jansen y Marcolino (Tito) Nicolaas cu nan faha preto den e arte di Jiu-Jitsu. Darren Jansen y Tito Nicolaas a train hunto cu Team Agua Aruba pa mas cu 12 aña y ambos ta fungi como “assistant coaches”.
Professor Chris Arends y su ekipo completo ta hopi orguyoso di Darren y Marcolino cu e logro grandi aki y ta extende na ambos palabra di elogio pa nan consistencia, dedicacion y sacrifcio durante tur e añanan. Un palabra di pabien ta bay tambe pa tur alumnonan promovi den rango. E ekipo completo ta tremendamente orguyoso cu e grupo aki, cu sa di demostra hopi dedicacion y progreso den nan practica.
E momento aki tabata e oportunidad perfecto pa reintroduci e ekipo bou di e nomber nobo: “Chris Arends Jiu-Jitsu”. Desde e momento aki Chris Arends Jiu-Jitsu ta afilia nan mes na e organisacion NS Brotherhood, despues di a carga e bandera di Team Agua Aruba pa mas cu un decada largo. E decision aki sigur ta uno positivo, cu e meta pa por sigui desaroya e arte marcial di Jiu-Jitsu aki na Aruba bou liderazgo di Professor Chris Arends. E desicion aki sigur ta beneficia su alumnonan y duna oportunidad pa por competi internacionalmente na competencia nan di IBJJF (Interational Brazilian Jiu Jistu Federation).
Na Brazil, a funda e organisacion NS Brotherhood door di Leandro Lo (q.e.p.d) cu ta un leyenda den e deporte di Jiu-Jitsu. Despues cu Leandro Lo a fayece, e ekipo a sigui bou maneho di e conocido Augusto Ferrari, cu tin diferente titulo campeon nacional y internacional den e deporte.
Riba e pagina di facebook di Chris Arends por tuma nota di su mensahe di gradicimiento na tur esnan envolvi, specialmente su famia pa tur sosten, sacrificio y dedicacion. Sentimiento di gratitud y orguyo ta loke Chris sigur ta expresa.
Chris Arends Jiu-Jitsu ta cla pa bay “next level”!
Ta invita un y tur cu ta interesa den e deporte di Brazilian Jiu-Jitsu pa bishita e localidad nobo ubica na COMPLEHO DEPORTIVO FRANKLYN BARENO. Ta ofrece klas pa ‘kids, youth & adults’ den un atmosfera relaha unda tur persona por sinti bonbini.
Kids:
Dialuna + diabierna 6.00 pm – 7.00 pm.
Youth & Adults:
Dialuna, diaranson, diabierna 7.00 pm – 8.30 pm.
Pa mas informacion:
Like y Share e Facebook: Chris Arends Jiu-Jitsu – NS Brotherhood
Follow Instagram: Chris_Arends_Jiujitsu
Celular: 5970976
