Faltando algun ora pa yama aña 2023 ayo, a sosode un accidente di atencion riba Camacuri, un poco mas pabou di Budget Car Rental.
Aki ta caminda cu chauffeur di un auto marca Nissan modelo Versa color bruin, pa un motibo of otro a perde control, baha caminda y bay dal frontal contra di un mata. Tur cos ta mustra cu e dama chauffeur tabata biniendo for di pabou direccion pariba.
E impacto tabata fuerte. Tin cu subraya cu e tabata asina fuerte cu hasta airbag di e auto e sali.
Mirando e situacion cu e dama tabata aden pega den auto, tabata necesario pa e materialenwagen di brandweer presenta na sitio pa cort’e auto p’asina sac’e afo.
Personal medico di ambulance tabata riba un standby. Asina cu a caba di corta e auto, a hinc’e den ambulance y cu zwaailicht cu sirene a bay direccion di hospital p’asina e dama ricibi atencion medico avansa.
Polis di trafico ta esun encarga pa investiga y documenta e accidente aki. A nota un bon cooperacion entre polis, bombero y personal medico riba ambulance n’e sitio. E auto riba su mes, tin masha duda cu e lo por sigui move riba su propio forsa, mirando e daño ricibi.
