Den su reflexion pa yama aña 2023 ayo, parlamentario independiente mr. Gerlien Croes, a trece un mensahe resumiendo loke a transcuri den e diesdos luna tra’i lomba y analisa kico ta e miho rumbo pa tuma den e aña nos dilanti.
Croes ta reconoce cu aña 2023 a trece cambio drastico, inespera y alabes hopi impactante. El a siña nos tambe cu tin bes cambio no ta solamente necesario, pero nos unico opcion. Aunke a supera reto grandi, no por celebra nos pais su potencial of prosperidad, tanten cu esaki ainda no ta yega den cada cas y cada famia.
“E necesidadnan ta inmenso den nos comunidad, nos hobennan cu ta desea y merece mas oportunidad, nos adultonan mayor cu mester mas structura di cuido, hoben y adulto cu ta desea stabilidad, mama y tata cu ta anhela di por tin un bida di trankilidad cu nan famia,” ta algun ehempel cu e parlamentario a duna.
Su deseo ta pa nos pais por uni den e aña venidero. E ta convenci cu solamente e union aki lo por lidera e poder cu ta biba den nos pa un comienso nobo pa nos pais y cu e diversidad den nos comunidad solamente mester por trece nos mas cerca di otro.
Finalmente, mr. Gerlien Croes ta desea pa e splendor di amor lidera cada momento di nos bida, guia nos caminda, bendiciona nos famia y cu 2024 ta un aña yena cu perseverancia, salud compaña pa alegria. “Prospero aña 2024 pa cada habitante di Aruba.”
