Dialuna prensa y Aruba a cera conoci oficialmente cu BodyTech Grand Café, cu ta keda riba Sasaki, den e mesun edificio di e gym BodyTech.
Jason Gerling, a splica cu aunke nan tin e mesun nomber, e Café ta habri pa publico en general. P’esey tambe e tin su entrada separa na banda.
Durante un encuentro cu prensa, Gerling a splica cu e proyecto aki cu a bira realidad ta un restaurant cu ta habri pa desayuno y lunch, for di 7’or di mainta te cu 4’or di atardi. Loke cu ta wordo ofreci den BodyTech Grand Café ta platonan saludabel, sea ta pa combina cu bo plan di baha peso of pa crea musculo. E menu ta uno amplio, pa e gusto varia cu por tin.
E idea pa combina e dos proyectonan aki a surgi algun aña pasa. A traha duro riba e plan, mira kico ta necesidadnan. Di e forma aki ta encurasha un persona pa haci ehercicio y no mester busca rond un luga unda e por busca su desayuno of lunch saludabel cu ta cuadra cu e plan di sea baha peso of crea musculo, pero cu bon conseho. Tambe nan ta ofrece juicenan saludabel y fresco. “Salud no ta solamente movecion pero tambe e ta encera un bon alimentacion,” Jason Gerling a splica.
BodyTech Grand Café ta habri pa publico en general, pues no mester ta miembro di e gym pa haci uzo di e Café.
Tanto e Gym como e Café ta situa riba Sasaki, unda antes tabata Dura Home Center.
