Na 2017 Cede Aruba a acerca Aruba Timeshare Association (ATSA) pa wak con nan por a haci un proyecto hunto, un tipo di fundraising den turismo. A haci un investigacion bao di e Timeshare owners pa wak si nan kier contribui na comunidad di Aruba y esaki a duna resultado positivo.
Kimberly Mathilda, proyect leader pa Happy Community Initiative, a splica cu ora cu e encuesta a wordo haci, e resultadonan tabata astronomico, ya cu 50% ta bisa cu si nan kier yuda Aruba sea den un donacion boluntario of duna nan tempo boluntario na un proyecto.
Mirando e resultado aki, a firma un contract dia 16 di januari y dialuna den oranan di merdia tabata lansamento oficial di e website y e proyecto.
Donacion
Turistanan cu kier haci un donacion, por bay riba nan website, cual ta: www.happycommunityaruba.org y tambe tin cierto hotelnan cu tin un donation kiosk.
Timeshare resortnan cu a informa cu nan ta participa den e proyecto aki ta Playa Linda, Paradise Beach Village, La Cabana, La Quinta y Costa Linda. Na e hotelnan aki tin un donation kiosk unda e hendenan por bay y e experiencia di haci un donacion cu ta tuma nan solamente 20 pa 30 seconde.
Mathilda a sigui splica cu nan ta enfoca riba tres cos. Cuater for di 10 mucha di edad entre 12 pa 18 aña ta keda na cas despues di scol, cual ta un problema. Tambe e mesun mayornan cu sea no por paga un programa despues di scol of muchanan ta keda nan so, no tin caminda pa manda e muchanan despues di vakantie.
Tambe 6 for di 10 mucha no ta caba scol. E iniciativa di e proyecto aki ta pa por provee fondo pa un programa despues di scol, mentorship activities durante vakantie. No solamente e mucha ta keda un caminda y tin supervision, nan ta wordo stimula cu deporte, arte cultural.
Tambe kier sostene “youth at risk”, esta un leerwerktraject pa esnan cu no a caba scol. Aki por haya un stage y despues haya trabao den companianan di Aruba.
Actualmente tur hende ta bon bini pa haci donacion. Pero ta enfoca mas riba turista. Mas cu claro localnan tambe por bay riba e website y haci un donacion of haci un donacion na un di e hotelnan ya menciona.
Splicacion na e turista
E partnernan cu ta bay tin e kiosco den nan hotel, ta splica e turistanan kico e iniciativa ta encera p’asina nan por comunica e mensahe tambe na e bishitante. Ta provee nan cu herment manera e “ask me button”. Tambe nan ta haya flyers si en caso e trahado lubida kico e iniciativa ta. Ta train nan con pa splica e hendenan con nan por haci e donacion. Sinembargo e kiosco ta splica riba su mes, ora cu bay riba dje, bo por mira e comercial, por mira e flyernan y ey lo sa kico e iniciativa ta. Ora cu cuminsa bay riba dje, e mes ta guiabo kico ta pasa y e experiencia no ta tarda hopi.
A haya un regalo di Departamento di Impuesto, cu no ta importa cuanto donacion haya, no ta paga belasting riba dje. Full e fondo ta bay na e proyecto pa e muchanan.
