Luis Oduber di WEB, durante conferencia di prensa a splica cu despues di e blackout cu tabata algo total, den WEB tambe tur cos a paralisa, den un caso asina aki, prome cos ta pa mira kico a sosode. Mira kico instrumentonan ta indica di kico por a sosode.
A base di esey, si ta permisibel, ta cuminsa cu motor di emergencia, cual ta turbina di gas. Esey a start y asina poco poco a trece coriente den e central na prome luga, caminda cu operadornan ta maneha e planta. Una bes cu tin luz y tur cos eyden, a tuma contacto cu Elmar na prome instante, pa nan cuminsa prepara, pa asina cu nan ta asina leu, cuminsa suministra coriente bek na comunidad. Den un termino di mas of menos un ora y mey, a cuminsa suministra coriente bek na comunidad.
Esey a bay relativamente lihe, cu excepcion di e problemanan cu a haya pa cende e boilernan bek. Tabata tin dos boiler den operacion na momento cu e incidente a tuma luga. E boilernan a trip y a pone nan bek den servicio. Tabata tin poco reto cu no por a startnan mesora. Esey tambe ta den investigacion pakico no por a start asina lihe.
Pa mas of menos 5’or y mey, 6 ora despues di e blackout, full Aruba a haya suministro di coriente bek y for di e momento ey, tecniconan ta bezig pa percura cu e incidente aki ta investiga, pa haya sa kico a pasa y pa naturalmente preveni.
E meta primordial ta pa suministro continuo. Tin casonan caminda cu dependiendo di e factor humano, e operadornan trahando e ora ey, nan ta scoge pa benta un of mas bario afo, pa purba mantene e restante di unidadnan den operacion. Pero ta fraccion di minuut of tin biaha seconde, hopi biaha un hende humano, no por reacciona asina lihe.
E investigacion lo determina tur esey. Ta traha normalmente cu un timetable, cu ta cada seconde of fraccion di seconde, kico a sosode, pa por saca afo precies unda e fayo a tuma luga y pakico e mester a yega na un blackout total.
Tambe loke cu a sosode cu den cierto bario e presion di awa a cay. Esey ta depende unda e bario ta situa, por haya presion via pomp. Na momento di blackout tur pomp ta stop di traha. Si ta biba cerca di un tanki y e presion a base di e awa den e tanki, kisas no a ripara e diferencia. Pero no ta asina cu tabata awa a bay for di servicio. Tankinan ta yen. Na momento cu a recupera e planta, a start op e unidadnan di awa y a sigui suministra comunidad cun’e.
