Campeonato Heineken fast pitch di Aruba Softball Bond dedica na baluartenan Jacobo Jansen y Gilbert “Nando” Maduro a continua riba veldnan na Pos Chiquito. Den categoria A-Klas Blackhawks y White Joker a brinda fanaticada un tremendo espectaculo. Finalmente Blackhawks ta bay cas cu e Victoria 3-2.
Blackhawks ta anota 1 careda den promer inning pero White Joker ta empata den bom di dos innng. Blackhawks den cabez di 3 inning ta rally pa 2 careda y ta hasi e score 3-1. White Joker ta menasa den bom di 4 pero ta anota 1 careda so y asina wega a termina 3-2 na fabor di Blackhawks. Blackhawks 3 careda, 7 hit, 2 error y ta laga 5 coredor na base. White Joker 2 careda, 7 hit, 3 error y ta laga 9 coredor den circulacion.
Mihor bateadornan pa Blackhawks a resulta di ta Yeisid de Kort 3-2 cu 2 careda anota, Jomir Vrolijk 3-2 cu 1 careda anota, Rodney Kelly 3-2, Everick Rincones di 3-1. Pa White Joker a destaca na bate Dylan Geerman, Mario Kock, Kurdan Josephia y Rajiv Cornelio tur di 3-1, Roderick Angela 1-1 y Henk Arnold himself 2-2. Efraim Leon ta bay 4 inning y ta seya e victoria riba su nomber enfrentando 21 bateador lansando 31 bola, 43 strike pa un total di 74 pitch permitiendo 2 careda, 7 hit y ta regala 2 base por bola. Clay Shipley ta releva tirando 2 inning y ta pone un wega salba riba su nomber.
Henk Arnold di otro banda a bay e ruta completo enfrentando 26 bateador lansando 6 inning, 67 pitch permitiendo 3 careda, 7 hit y no ta regala base por bola pero mester conforma su mes cu e derota. Weganan di campeonato ASB ta re-anuda diamars awor na veld di Dragon Hitters.
