Bisiñanan na De Vuyst ta rabia: Negoshi di tereno ta continua

Money Talks, ta loke un bisiña na De Vuyst a menciona, den e caso caminda cu a bende un tereno erfpacht net banda di Kamini’s Kitchen.

Kamini Parsan-Kurvink, propietario di e restaurant a expresa su preocupacion na momento cu 24ora.com a combersa cun’e riba e mesun asunto aki. Segun e propietario, un hende a bende e tereno banda di dje na balor di 80 mil florin cu un Chines, sin fundeshi. “Con bo ta bende un erfpacht sin fundeshi y ta bisa cu ta bay traha algo eyriba.”

 

E Chines a bis’e cu e ta bay traha un cas chikito awo, pa despues cambi’e pa un negoshi. Kamini a splica cu ora ta haya un tereno, notario ta indica den un documento cu e ta dun’e na un cas of comerciante. Kamini a splica cu e mes a pidi un tereno patras di su negoshi. E bisiña tambe a pidi e tereno en cuestion. Sinembargo nan a bis’e cu ta un hende local ta e doño. Ora bo tin un tereno, bo tin cu simplemente bay bend’e, gana placa riba gobierno su cabes. Comerciantenan local awo ta pagando pa esey y esey no por, segun Kamini. E tereno banda di dje cumpra pa e Chines ta bashi, sin ningun fundeshi. Kamini ta preocupa y tambe, e no kier ningun Chines bin banda di dje. Kamini no kier cualkier hende bin eynan. Si e tereno ta pa cas, ta un cas tin cu traha eyriba. E no por cambia pa negoshi. Na notario caba e ta tereno erfpacht pa traha cas. No por traha nada otro, sino un cas.

Bisiñanan preocupa

Un di e bisiñanan a comenta cu nan no por compronde con por ta cu un tereno cu ta erfpacht, cu nan mes personalmente a aplica pa nan wak si nan tambe por a haya e tereno. Pero a informa nan cu no, no ta posibel pasobra e ta riba nomber di otro hende.

A mira borchinan cu tabata pone cu e ta na benta, etc. Ora cu a bay puntra, nan ta bisa pa kita e borchi, pasobra no por bende erfpacht. Al fin y al cabo, a resulta cu un Chines si a cumpr’e, cu intencion pa haci negoshi. Esaki ta un area residencial, e ciudadano a enfatisa.

Nan tin entendi cu e persona a guia e Chines masha bon via di DIP, via di diferente departamento, pa e pone su peticion como residencial, traha cualkier cos tanten riba dje y finalmente bay via e ministernan pa cambia e beschikking pa haci’e comercial. Esey ta locual cu tin e bisiñanan hopi preocupa y disgusta.

Tin yen di cas den e area pa bolbe pone un supermercado, un compleho di apartamento, un minimarket, loke sea cu nan kier pone eynan, no ta bon.

Nan tin nan guianan y nan tin e hendenan cu ta yudando nan. E bisiñanan ta wak y pensa cu e gobierno aki berdad por a lanta un departamento cu ta bay guia, cu ta bay pone structura. Aworaki ta ripara cu no t’asina.

E bisiña ta sigui conta cu e conoce e persona y a papia cun’e y a inform’e cu esey ta locual cu nan a splica e Chines pa haci. Tin otro famianan cu a haci e mesun cos den varios districto. E ta algo cu ta andando.

Por a mira cu claramente aki ta placa ta papia.