Diabierna tabatin hopi vigilancia na Corte di Corsou pa tratamento di e caso di asesinato di e rapper Boechi.
A acusa e homber Christopher Z di a tira Ruchendel ‘Boechi’ Windster mata den Willemstad. A pidi un castigo di 22 aña pa e homber ey mientras cu pa su complice Churendi C., fiscal a exigi un castigo di 19 aña.
E rapper Boechi tabata biba na Tilburg, pero den e anochi di 9 di december di aña pasa, a tir’e mata. El a ricibi varios impacto di bala y a fayece na e sitio.
E principal sospechoso, un mucha homber di 24 aña, pa colmo ta famia di Boechi mes. Supuestamente Christopher hunto cu e homber Churendi di 44 aña tabata den un vehiculo cu tabata core tras esun di Boechi.
Dado momento e auto di e rapper a para na un snacktruck, Christopher a baha, bay na e auto di Boechi y a tir’e mata. E causa di exacto no por a saca afo ainda pasobra Chris ta nenga. Churendi a bisa cu nan tabata kier a horta e cadena di Boechi y e pensamento no tabata pa mat’e. Pero den e sesion Pro Forma el a grita Churendi pa papia berdad, cu no tabata pa e cadena so.
Loke ta straño ta cu den Corte e mucha homber Christopher ta nenga cu e tin algo di haber cu e asesinato. Su complice Churendi a conta un storia diferente. El a declara dilanti Hues cu despues cu Christopher a los e tironan, el a yama un hende y a bis’e “e asunto ta cla”.
