Michael Croes, hunto cu Juffrouw Rachel cu ta forma parti di e ekipo activo di Scol Cacique Macuarima, a trece dilanti di e bingo cu a tuma uga dia 1 di December ultimo, cu a tarda un tiki pa bin cu e ultimo resultadonan, pero kier a trece tur cos dilanti y bin cu un miho bista di e ingreso cu a tuma luga riba e dia aki.
E bingo riba su mes a bay hopi bon y ta gradici comunidad pa esaki. E suma cu a logra haya e dia aki, tabata 42.645,25 florin, cual tabata e ganashi overal. E gastonan tabata core den 16.151,65 florin.
Scol Cacique Macuarima ta gradici comunidad inmenso pa e placa aki y e oportunidad pa por a mustra cu por haci algo bunita pa e muchanan.
E suma recauda, automaticamente no ta logra pa instala airco den klas. E unico cos cu nan por a haci ta pone coriente. Actualmente trabaonan di coriente a cuminsa na scol.
Kico kier bay haci
Loke cu scol ta bay haci pa colecta e placa, ta un sponsorloop. Croes ta remarca cu si tin compania cu kier donate un airco of sponsor un suma pa yega na e airco, ta mas cu bon bini. Pa dia 15 di Februari, e trabaonan di coriente ta premira pa ta cla, incluyendo keuring.
Ta pa e motibo aki ta urgi na comunidad, comerciantenan cu ta bende airco, pa kisas por haci un donacion di un airco. Instalacion no ta problema, pasobra nan mes por percura pa esey.
26 airco
Ta trata di 26 airco, di 24 mil BTU pa asina nan por tin e capacidad pa por yega den e kas. Nan lo bay tin mester di 24 airco di 24 mil BTU y 2 airco ta bay ta di 18 mil BTU.
Croes ta gradici comunidad completo pa e aporte y tambe haci apelacion na cualkier comerciante cu lo kier duna un sosten sea di airco of monetario, lo ta hopi bon.
Actividad
E proximo actividad cu e scol lo bin cun’e, ta sponsorloop. Segun juffrouw Rachel, mirando cu ainda falta un tiki mas pa yega na e suma pa yega na tur e airconan, nan a dicidi pa haci e sponsorloop. Esaki ta bay simplemente un evento caminda cu famia of comunidad ta sponsor e muchanan, pa core un x suma di buelta. Ainda no sa unda e lo tuma luga, posiblemente den cura di scol mes. E intension ta cu nan lo haya un carchi manda cas, cu nan mayor of famianan por indica cuanto nan lo sponsor e mucha. E suma maximo ta 25 florin. Esey ta loke bay haci pa loke ta e siguiente evento.
E evento aki ta premira di ta mas of menos den luna di Mei, pero esey lo bay keda pendiente.
Lo bay tin mas actividad pa e muchanan en todo caso, caminda cu pueblo tambe por participa. Pa loke ta e sponsorloop, tur hende ta bon bini pa yuda y cada mucha ta haya chens pa core.
Un paso mas dilanti
Awor aki e scol ta un paso mas dilanti, mirando cu e instalacion di coriente ta den su fase final. Awo tur loke falta ta e airconan. Nos lo keda pendiente pa loke ta e sponsorloop riba ki fecha esaki lo tuma luga.
