Mama di dos participante di Calypso y Roadmarch hubenil Zyqu y Zyquello Guerrero, esta Vivian Jansen a conta nos cu su yiunan tin varios aña ta competi den e festival aki. Nan ta cuminsa prepara for di december caba cu nan composicion. E muchanan a presenta diadomingo y a lanta animo di publico cu e presentacion di e muchanan.
E mama a comenta cu el a puntra un di su yiu hombernan si t’e a tira boter ora a nombra Justin como Rey di Calypso. E yiu a bisa cu e no a haci’e. Pero si el a haci’e mes, e mama ta pidi disculpa, pasobra ta su emocionnan na e momento ey. Na final, nan ta mucha y nan ta bay pa un solo meta. Nan tambe sa cu no ta un aña nan a competi. Ora cu nan caba di canta y con nan ta haya e apoyo di e publico, con ta bisa nan cu “t’abo t’esun”, tin sentimentonan envolvi.
Locual a pasa cu e trofeo ta cu ora cu a yega cas, e trofeo a keda p’afo, pero e no a keda p’afo pasobra a tir’e afo. Ta un descuido. Di tempran nan tabata p’ariba y nan a yega cas laat, mirando cu su dia siguiente mester a bay scol. Un auto a pasa e anochi ey, mirando cu e trofeo tabata pafo, a bay cun’e dilanti di e cas. Ta banda di 2’or di marduga, su ruman muhe a yama y a bis’e cu tin yen di cos ta pasando.
El a tuma contacto cu e persona cu a haya e trofeo. E persona a bisa Jansen cu el a haya e trofeo riba caminda. Jansen ta conta cu su yiu, esta Zyquello, a bin cu su trofeo den su man y no por a tira e trofeo nunca riba caminda. Ta algo cu e mucha a haci. E lo a lag’e accidentalmente pafo y no ta trata cu el a benta su trofeo afo. Semper ora cu e haya su premionan, e tabata keda contento. Aunke cu e no a gana, pasobra esey ta bay p’e, si wak e potretnan, e tabata contento.
E mucha a competi cu 17 participante y a cay den premio. Tur e speculacionnan ta haci cu a base di e cancion cu Zyquello a canta, ta pas precies, esta nan a haci net loke el a canta.
Vivian Jansen a felicita e ganadonan. E resultado ta keda den man di hurado y no por haci nada cu esey. Pa loke ta otro aña, Jansen a splica cu su yiunan lo no participa mas. Esaki tabata nan ultimo aña!
