Fundacion Kapel di Bethania (FKB) ta habri e portanan di Klooster Imeldahof pa henter pueblo di Aruba riba ‘Dia di Himno y Bandera’ 18 di maart for di 9:00 am pa 2:00 pm. Un y tur lo tin e posibilidad pa haya experencianan varia riba e dia di celebracion aki.
Actualmente e hobennan boluntario di FKB a traha riba un bunita exposicion temporario cu e titulo ‘Vestuario Liturgico’. Specialmente riba e dia aki lo por haya un guia di e hobennan. Por pasa y haya informacion di e exposicion ‘ Historia parokia di Noord’ y admira e Kapel di Behtania, cu ta e unico kapel di e estilo monastico cu tin na Aruba den su forma original.
Banda di esaki tambe lo tin e Bazaar unda por cumpra cos dushi, artesania, prenda, productonan y mas. E bar y cushina lo ta bon surti, lo tin diferente platonan dushi crioyo. Musica lo ta den encargo di amigo boluntario di FKB, Igmar Maduro unda algun participante di e festival di ‘un canto na nos Himno’ lo haci nan presentacion. Lo tin oportunidad pa registra como boluntario pa esunnan cu ta interesa pa yuda cuida y conserva e edificio monumental.
