E seleccion femenino di Aruba U15 a empata 0-0 contra Surnam durante e di dos dia di e Girls U15 Invitational Tournament, organisa den cuadro di e FIFA Women’s Development Programme. Ambos seleccion tabata drenta e encuentro despues di a logra un victoria den nan prome partido, loke a haci e duelo un di e encuentronan mas spera di e torneo.
Desde cu e referee a duna señal pa inicia e partido, Surnam a busca pa ataca rapidamente. Aruba, sinembargo, no a keda atras y tambe a sali na buskeda di e gol. Durante e prome tempo, ambos seleccion a pone presion riba otro y a busca e manera pa habri e marcado.
Aruba a haya algun oportunidad pa anota, pero e hungadonan no a logra concretisa nan. Surnam tambe a yega cerca di e gol Arubiano, sin logra cambia e resultado. Despues di e prome 40 minuut, e marcado a keda 0-0.
Den e di dos tempo, Surnam a subi e presion riba e seleccion Arubiano. Sinembargo, e hungadonan di Aruba a sigui lucha y no a laga e presion haci nan perde e concentracion. Pocopoco, e partido a bira mas intenso, cu varios confrontacion fuerte entre hungadonan di ambos seleccion.
E intensidad di e encuentro a trece varios amonestacion. Den e segundo tempo, coach di Aruba tambe a ricibi un carchi geel despues di a protesta pa un accion den cual un hungado di Surnam a dal contra di un hungado Arubiano, cu a cay na e momento.
Pa Aruba, Deniciënne Maduro, hungado number 11, a ricibi un carchi geel. Despues, Aryeana van der Linde, number 17, y Natuishka Kwidama, number 9, tambe a haya carchi. Di banda di Surnam, Atalja Leysner number 13 a ricibi un carchi geel.
Un miembro di e cuerpo tecnico di Aruba tambe a ricibi un carchi geel. Mas despues, e referee a mustra un carchi cora na un miembro medico di e delegacion Arubiano. Como consecuencia, e miembro medico no lo por tuma luga den banki di e seleccion durante e siguiente partido di Aruba, sino cu lo mester sigui e encuentro for di tribuna.
Durante e partido, tabatin varios momento den cual e decisionnan di e cuerpo arbitral a hala atencion. Segun loke por a observa durante e encuentro, tabatin accionnan cu por tabata considera hands ball cu no a resulta den fluit. Tambe tabatin momento den cual hungadonan di Surnam a empuha hungadonan Arubiano, sin cu e referee a interveni inmediatamente.
Ademas, e linesman a señala posicion adelanta contra Aruba na tres ocasion.
Na final, a pesar di e intensidad y oportunidadnan di ambos banda, ningun di e dos seleccionnan a logra marca. E partido a termina 0-0, cu Aruba y Surnam compartiendo e punto den di dos dia di e torneo.
