A cuminsa sinti e aumento di actividad di turismo crucero desde diadomingo ultimo, 11 di october, cu e bishita di Freedom of the Seas di Royal Caribbean na Aruba. Taxistanan a expresa nan satisfaccion cu e movecion, despues di lunanan den cual temporada abou a afecta nan cantidad di trabou drasticamente.
Segun e taxistanan, e diferencia entre temporada abou y temporada halto ta evidente. Durante e lunanan cu menos barco ta bishita Aruba, e demanda pa transportacion y tour ta baha considerablemente. Awo cu e actividad ta aumenta, nan ta sinti e cambio mesora den e oportunidadnan pa genera entrada.
Temporada halto
Oficialmente, temporada halto di turismo crucero ta cuminsa 1 di october y ta sigui te 30 di april. E cantidad di bishita di barco, conoci den e sector como “calls”, generalmente ta cuminsa aumenta durante e di dos mita di october. Dentro di temporada halto, e periodo di 1 di december te 31 di januari ta destaca como un periodo di hopi movecion. Temporada abou ta core di 1 di mei te 30 di september.
Pa october so, e programacion ta contempla 29 calls na Aruba. Esaki ta representa 29 bishita di barco, cu ta trece oportunidad di trabou pa taxistanan, operadornan di tour, comerciantenan, restaurantnan y otro negoshinan cu ta atende cu e bishitantenan.
Freedom of the Seas cu un estadia largo na Aruba
Segun e horario di e bishita di diadomingo, Freedom of the Seas tabatin su entrada programa pa 8:00 di mainta y su salida pa 11:00 di anochi. E orario ta representa un estadia di 15 ora den waf, ofreciendo pasaheronan oportunidad pa explora Aruba durante dia y parti di anochi.
Freedom of the Seas ta un barco di Royal Caribbean cu a drenta servicio na aña 2006. E compania ta indica un capacidad di aproximadamente 3.750 pasahero. Abordo e ta ofrece, entre otro, e tobogannan The Perfect Storm, e simulado di surf FlowRider, actividadnan pa mucha y hoben, restaurantnan y entretenimiento.
Un bishita cu un horario amplio ta crea posibilidad pa pasaheronan combina un tour cu beach, compras of un comemento na tera. Pa esnan cu ta traha directamente cu turismo crucero, esaki ta amplia e oportunidadnan pa ofrece nan servicio.
Un gasto promedio di US$197 pa bishita
Segun e datonan comparti di e 2025 Cruise Survey Report di Aruba Tourism Authority (ATA), un pasahero di crucero ta gasta un promedio di US$197 durante su bishita na Aruba.
E tempo promedio cu un pasahero ta pasa na tera ta aproximadamente 4 ora y 50 minuut. Combinando e dos cifranan, esaki ta representa un gasto promedio di cerca US$40,75 pa ora durante su tempo na tera.
E estudio ta indica tambe cu, entre e pasaheronan cu a informa nan entrada familiar, 42% ta pertenece na un hogar cu ta gana mas cu US$100.000 pa aña. E dato ta duna un indicacion di e capacidad economico di un parti di e bishitantenan cu ta yega cu crucero.
Crucero ta habri porta pa un siguiente bishita
E impacto di turismo crucero por sigui tambe despues cu e barco a sali. Segun e 2026 State of the Cruise Industry di Cruise Lines International Association (CLIA), 6 di cada 10 pasahero ta regresa na un destinacion cu nan a conoce inicialmente durante un crucero.
Pa Aruba, esaki ta representa un oportunidad pa transforma un prome contacto di algun ora den un siguiente vacacion. E experiencia cu e pasahero ta haya cu transportacion, servicio, atraccionnan y hospitalidad por contribui na su decision pa regresa.
E industria ta inverti den mas opcion di combustibel
E industria di crucero ta cambia tambe den e tecnologia cu ta uza pa move su barconan. Segun e informe di CLIA ta indica cu na cuminsamento di aña 2017, un total di 19% di e barconan tabatin capacidad pa uza LNG. Awendia, 57% di e barconan tin capacidad pa uza varios tipo di combustibel, conoci como multi-fuel. E ultimo cifra ta referi na capacidad multi-fuel y no exclusivamente na LNG.
LNG ta nifica gas natural likifica. E ta un combustibel cu e sector ta considera como un opcion di transicion den e proceso pa reduci emisionnan y avansa den otro fuentenan di energia.
Ta anticipa un bon temporada
Mientras e industria ta sigui desaroya, pa taxistanan na Aruba e cambio mas inmediato ta e regreso di mas movecion na waf. Cu 29 bishita programa pa october y e aumento di calls durante e di dos mita di luna, nan ta mira e temporada halto cu speransa pa mas trabou y mas entrada.
