E Fondo General di Inversion y Desaroyo (AIOF) a completa un fase importante den su implementacion, despues di dos dia di debate den Parlamento tocante su prome presupuesto pa e añanan 2026 y 2027. Segun Minister di Finansa, Asunto Economico y Sector Primario, mr. Geoffrey Wever, e proceso ta marca un paso importante pa establece un sistema di inversion publico cu planificacion multianual, control parlamentario y rendicion di cuenta.
E proceso a cuminsa cu aprobacion di e ley pa crea AIOF dia 9 di juli 2026. Despues, Gobierno a prepara y entrega e prome presupuesto di e fondo na Parlamento dia 6 di augustus 2026. Durante e proceso parlamentario, parlamentario a presenta un total di 404 pregunta tocante e presupuesto y e funcionamento di e fondo. Gobierno a contesta tur e preguntanan, permitiendo cu e debate por sigui.
Minister Wever ta enfatisa cu AIOF no ta solamente un fondo pa financia proyecto, sino un instrumento cu ta permiti Aruba planifica inversion publico riba varios aña y conecta presupuesto cu proyectonan concreto y resultado pa e comunidad.
“Cu AIOF nos no a crea simplemente un fondo. Nos a crea un instrumento cu mester pasa door di ley, presupuesto, control parlamentario, evaluacion y rendicion di cuenta. E proceso cu nos a sigui for di juli te awe ta exactamente loke bon maneho financiero ta exigi,” Wever a declara.
AIOF tin como meta financia inversionnan publico cu ta contribui na bienestar y desaroyo di Aruba. E recursonan por bini for di presupuesto di Pais Aruba y tambe por inclui contribucion di tercer partidonan. E fondo ta conecta cu un Agenda di Inversion Multianual, cu ta permiti Gobierno prepara y ehecuta proyectonan cu por dura mas cu un aña presupuestario.
E prome presupuesto ta contempla inversionnan den diferente area, incluyendo infrastructura, facilidadnan di enseñansa, renobacion di bario, facilidadnan publico, mehoracion di servicio di Gobierno y desaroyo sostenibel.
Dia 14 di september 2026, Parlamento a presenta su informe cu e 404 preguntanan tocante e presupuesto. Gobierno a prepara y entrega contestacion pa tur e preguntanan, amplia informacion tocante e funcionamiento di AIOF, e proceso pa prepara y evalua proyectonan, e financiamento, e control financiero y e manera cu Gobierno lo sigui e inversionnan durante nan ehecucion.
Pa Wever, e cantidad di pregunta parlamentario ta forma parti di control democratico y no mester considera esaki como un obstaculo.
“Transparencia y rendicion di cuenta ta parti di e proceso. Parlamento mester haya e informacion necesario pa por cumpli cu su rol, y Gobierno mester ta prepara pa contesta, splica y aclara,” e minister a indica.
Durante dos dia di debate den Parlamento siman pasa, parlamentario a presenta preguntanan, observacionnan y preocupacionnan tocante e presupuesto, e funcionamento di e fondo y e proyectonan proponi. Wever y otro miembronan di Gobierno a haya oportunidad pa responde y duna aclaracion riba e puntonan presenta.
E debate no a concentra solamente riba e cifranan di e presupuesto, sino tambe riba e motibo pa Aruba tin un instrumento di inversion multianual, e criterianan pa evalua proyectonan y e papel di Parlamento den autorisacion y control di recursonan publico.
AIOF tin su propio presupuesto, cu entrada, obligacionnan financiero y gastonan. E presupuesto di e fondo ta forma un parti separa di Presupuesto di Pais Aruba, mientras su cuenta anual ta consolida cu esun di Pais Aruba. E administracion di e fondo ta cay den e structura financiero di Gobierno, cu control y raportage como elementonan importante.
Segun Wever, un inversion publico no mester midi solamente na e cantidad di placa cu Gobierno ta gasta, sino tambe na e calidad di preparacion, e posibilidad pa ehecuta e proyecto y e resultado cu e comunidad por observa.
“Bon inversion no ta cuminsa cu gasta placa. E ta cuminsa cu prepara un proyecto bon. Y bon maneho financiero no ta termina ora presupuesto ta aproba. E mester sigui te ora proyecto ta ehecuta y resultado ta visibel,” e minister a declara.
Despues di e creacion legal, preparacion di presupuesto, e ronda di pregunta parlamentario y e dos dianan di debate, e siguiente desafio ta pasa di planificacion pa ehecucion y sigura cu e inversionnan ta produci resultado concreto pa Aruba.
Wever a enfatisa cu e fondo no ta e meta final, sino un instrumento pa contribui na mehoracion di e pais mediante inversionnan cu por sigui, controla y evalua.
“Nos a pone e base legal. Nos a prepara e presupuesto. Nos a contesta Parlamento su preguntanan y nos a trata e presupuesto ampliamente. Pero e fondo no ta e meta final. E meta ta inversion cu ta mehora Aruba y resultado cu pueblo por mira, sigui y evalua,” Wever a conclui.
