E reconocemento oficial di Cas di Famia Loefstop como un monumento protegi ta marca un milestone significativo den e esfuersonan pa preserva e rico patrimonio cultural y historico di Aruba. E decision aki no solamente ta honra e historia di un famia cu a mantene e propiedad aki pa generacionnan, sino cu e ta habri caminda pa enriquesa e identidad cultural di e isla y sirbi como un ehempel di inspiracion pa e comunidad den proteccion di nos casnan tradicional.
Servin Loefstop a expresa su orguyo cu e cas historico di su famia awor ta pasa oficialmente pa un monumento protegi. Hunto cu Prome Minister mr. Mike Eman, Loefstop a celebra e paso importante den e proceso di preservacion di patrimonio historico y cultural di Aruba.
Aunke e famia nunca a biba den e cas, e propiedad tabata semper huur pa su bisawela. E cas a keda den e famia durante generacionnan, mientras su bisawela tabata huur e durante hopi aña. Despues di su fayecimento, aproximadamente 20 aña pasa, e propiedad a keda den man di e famia.
Un patrimonio cu tin balor pa henter Aruba
Durante un entrevista, Servin Loefstop a destaca e balor historico di e casnan tradicional pa Aruba. Segun dje, e importancia di preserva e tipo di propiedad aki ta bay mas leu cu e barionan di Rancho y Ranst, pasobra nan ta forma parti di e historia y identidad cultural di henter Aruba.
“Nos mester mantene nos cultura, y un monumento ta algo cu ta percura pa nos historia keda visibel,” Loefstop a enfatisa.
E proceso pa yega na e decision aki no a cuminsa di un dia pa otro. Loefstop a splica cu e y su ruman homber tabata discuti e posibilidad di preserva e propiedad caba durante un tempo. Nan tabata considera e idea di desaroya un proyecto alrededor di e cas historico.
Ora Stichting Monumentenfonds Aruba a acerca nan cu e oportunidad pa traspasa e propiedad oficialmente pa un monumento protegi, nan a reacciona cu hopi entusiasmo. E famia a mira esaki como un oportunidad pa contribui na preservacion di un parti importante di patrimonio historico di Aruba.
Un yamada na famianan cu tin cas historico
Na final di e entrevista, Servin Loefstop a manda un mensahe na otro habitante- y famianan cu tin propiedad historico den nan posesion. E yamada di dje ta pa nan considera cuidadosamente e posibilidad di preserva nan casnan, en bes di pensa solamente na deshaci di e propiedad.
“Pensa riba dje. No dicidi mesora di deshaci di dje, sino pensa riba boso mes y riba e generacionnan venidero, e ciudadanonan di Aruba,” Loefstop a expresa.
Preservacion di cas historico ta ofrece famianan e oportunidad pa contribui na proteccion di identidad cultural di Aruba. E casnan aki ta representa mas cu solamente edificio: nan ta testimonio di bida, custumbernan y historia di e generacionnan cu a forma e comunidad di awe.
Pa Servin Loefstop y su famia, e traspaso di e propiedad pa un monumento protegi ta un paso importante pa percura pa e patrimonio keda visibel y conserva pa generacionnan venidero.
