Damian “The Baba Yaga” Pinas a logra un victoria contundente diasabra, 3 di october, durante UFC 332 na Delta Center den Salt Lake City, Utah. E peleador cu ta representa Aruba a derota Andrey Pulyaev cu knockout despues di solamente un minuut y 15 seconde den e prome round.
E pelea den e categoria middleweight a termina cu un uppercut potente cu a conecta directamente cu e cachete di Pulyaev. Prome cu e golpi decisivo, Pinas a lanza un golpi di man drechi direccion cabez di su oponente. E uppercut cu a sigui a manda Pulyaev abou, terminando e encuentro rapidamente.
Referee Herb Dean a interveni inmediatamente pa stop e pelea. Cu e resultado aki, Pinas a suma su di tres victoria den UFC, manteniendo su record invicto den e organisacion cu tres triunfo den tres pelea. Tur tres a termina den e prome round.
Pinas a debuta den UFC na februari 2026, ora el a derrota Wes Schultz cu golpi na 2 minuut y 30 seconde den e prome round. Despues, na juli, el a gana Cesar Almeida cu knockout na 4 minuut y 44 seconde, tambe den e prome round. E victoria contra Pulyaev ta agrega otro final rapido na su trayectoria.
Den su entrevista despues di e pelea, Pinas a expresa cu ainda e no a mustra tur su forsa y cu practicamente e no tabata calenta ainda ora e encuentro a termina. Su actuacion ta sigui pone atencion riba e peleador den e division middleweight.
Pinas, naci na Paramaribo, Suriname, a bin biba na Aruba na edad di 16 aña. Awor e ta sigui construi su trayectorio internacional, representando Aruba den e octagon di UFC.
