E seleccion femenino U15 di Aruba a cuminsa cu un victoria den e Girls U15 Invitational Tournament di FIFA Women’s Development Programme. Aruba a derota Formas Intimas di Colombia cu score di 1-0, y esaki tabata danki na e gol di Natuishka Kwidama den di prome mita.
E partido a cuminsa pa 7:15 pm, cu Aruba subiendo veld cu e meta pa cuminsa e torneo cu un bon resultado. Na comienso caba por a ripara cu e wega tabata basta bon, unda cu ambos ekipo tabata busca pa anota e prome gol. Un bon oportunidad a bini pero linesman a hisa su bandera indicando posicion adelanta pa Aruba. Wega a continua, cu ambos buscando e gol.
E gol cu a defini e partido a yega na minuut 38. Kaylee Vlijt, cu camisa number 10, a logra kita e bala for di un hungado Colombiano. Maduro a pusha e bala un tiki mas dilanti, dunando Vlijt e oportunidad pa sigui cu e hugada.
Vlijt a pasa entre e defensanan di Formas Intimas, a hisa su cara y a mira Kwidama den un posicion faborabel. E number 9 di Aruba a ricibi e pase, a corta un tiki na su banda drechi y, cu su pia drechi, a manda e bala den net. E tiro a cay den skina di e arco, sin laga e goalkeeper Colombiano hopi oportunidad pa evita e gol.
Cu e gol di Kwidama, Aruba a bay descanso cu bentaha di 1-0, despues cu Formas Intimas no a logra capitalisa riba su intentonan pa iguala e score. Mester bisa cu den e torneo aki, e ekiponan ta hunga 40 minuut.
Formas Intimas a presiona, pero Aruba a tene su bentaha
Den e di dos mita, e conhunto Colombiano a sali cu mas velocidad y a intensifica su buskeda p’e gol di empate. Formas Intimas a mustra mas determinacion den su atakenan y a crea oportunidad, pero e gol no a yega.
Na algun momento, e hungadonan ofensivo Colombiano tabata presiona desde medio campo pa duna continuidad na e atakenan.
Aruba, di su banda, a purba aumenta su bentaha, pero e pasenan no semper a yega na e destino corecto. Formas Intimas a logra kita varios bala y limita e posibilidadnan di e seleccion Arubiano pa crea mas peliger dilanti di e arco.
A pesar di e presion Colombiano den e di dos tempo, Aruba a logra proteha su bentaha di un gol te na final y a celebra su prome victoria den e torneo. Sinembargo, e hungadonan mester tene cuenta cu no por bay den defensa so, pero mester bay den ofensivo buscando pa anota mas gol. Pasobra e hugada di defensivo por a costa Aruba sea un empate of por a perde.
Diamars Aruba ta enfrenta Surnam
E seleccion femenino U15 di Aruba lo bolbe na accion diamars pa 7:15 pm, ora e ekipo ta enfrenta Surnam den su siguiente compromiso.
Surnam ta yega na e partido despues di un victoria contundente di 8-0 contra British Virgin Islands, un resultado cu ta indica cu Aruba lo tin un reto exigente dilanti.
Despues di e victoria contra Formas Intimas, unda Aruba a cuminsa cu un bon inicio, ta buscando diamars un otro resultado positivo den e competencia internacional.
