Aruba Dolphins Open Water 2026 a reuni 127 participante diadomingo 27 di september na Commandeurs Bay, Savaneta, pa un mainta di competencia, union y inclusion. Famia, amigonan y e sostenedonan a bin anima e landadonan y contribui na un ambiente yena cu entusiasmo.
Organisa pa Aruba Dolphins Swimming & Waterpolo Club, e evento a inclui distancianan di 1, 3 y 5 kilometer, ademas di un relay di 1.5 kilometer cu e teamnan di tres landado. Hunto cu e landadonan local, e bishitantenan di Merca y Hulanda a participa, dunando e encuentro un toke internacional.
E participantenan di diferente edad y nivel a drenta lama cu nan propio meta: sea competi pa un luga riba podium, mehora nan prestacion of completa e distancia. E apoyo for di tera a compaña nan durante e reto y a haci cada yegada na nan meta un momento special.
Inclusion tambe tabatin un luga special. Un landado a participa, unda el a trek un kayak cu un atleta special abordo, pa hunto nan por a forma parti di e competencia. Nan lema, “Yuda e personanan cu limitacion yega na nan metanan den mundo di deporte”, sigur nan a realisa esaki e mainta aki. E participacion aki a mustra con apoyo y cooperacion por habri mas oportunidad den deporte.
Overall Winners
Den e 1 kilometer, Xylan Anthony a conkista e overall winner masculino cu 15:14.0, mientras Eva Kock a gana den e clasificacion femenino cu 15:17.1. Den e 3 kilometer, Zayron Werleman a gana den e clasificacion masculino cu 41:19.2, y Ginayla Arends a conkista e overall winner femenino cu 47:56.5. Den e 5 kilometer, Matthew Gobert a termina como overall winner masculino cu 1:10:14.9, mientras Chloë-Nicole Dirksz a gana den e clasificacion femenino cu 1:19:52.4. Aruba Dolphins ta felicita e ganadonan y tur participante pa nan esfuerso y perseverancia.
Un esfuerso comparti
E evento tabata tambe un actividad pa recauda fondo pa sostene e club y e desaroyo di su landadonan. Aruba Dolphins ta gradici tur empresa y persona cu haci posibel pa realisa e deporte, y na Minister Gerlien Croes pa su apoyo y 297 Sport p’e cobertura.
Un danki special na Roly y Winnie Bisslik, Hedy Slikker-Bisslik, famia Bisslik, famia Schwengle, Oma Greta, Oma Nina, Shanella Garido y Jenny van den Hengel, y tur famia cu a contribui espacio, material, cuminda y tempo. E club ta reconoce tambe Meet Director Louella Maduro y su team, e oficialnan, e ekipo di siguridad den kayak, e boluntarionan y e mayornan pa nan dedicacion.
Aruba Dolphins ta wak bek cu orguyo riba un evento cu a combina logro deportivo cu participacion y solidaridad. Danki na tur esnan cu a haci Open Water 2026 posibel y cu ta sigui sostene e futuro di natacion na Aruba.
