E conflicto rond di operacionnan di UTV, ATV y jeep na Aruba ta sigui genera preocupacion. Jimmy Douglas, propietario y operador di ArubaAriba Tours, a critica ausencia di Greg Peterson di Aruba Birdlife Conservation (ABC) durante reunionnan destina pa busca un solucion duradero.
Durante un entrevista cu 24ora.com, Douglas a splica cu aproximadamente cuater siman y mey pasa, hues a ordena partidonan envolvi pa sinta na mesa y busca un acuerdo, prome cu e caso yega corte.
Segun Douglas, a invita Peterson na mas cu cuater ocasion, pero e no a presenta. E empresario ta considera e actitud aki preocupante, specialmente mirando cu anteriormente Peterson a participa den reunionnan cu stakeholders tocante plan di turismo 2026-2031.
Tour operators ta presenta solucion
Douglas a enfatisa cu e tour operatornan no ta contra proteccion di naturalesa. Nan a presenta propuestanan pa establece rutanan asigna di seis meter hancho, dividi den dos direccion, instala borchinan di velocidad y introduci programanan educativo pa tour guides.
Tambe el a reconoce cooperacion di minister Rene Herdé, Direccion di Naturalesa y Medio Ambiente y DIP den buskeda di solucion.
Segun Douglas, e sector ta representa un fuente importante di entrada pa hopi famia y mester considera den cualkier decision.
El a lamenta cu Peterson no a comparti propuestanan concreto cu e operadornan durante e periodo aki. Douglas ta insisti cu proteccion ambiental y desaroyo economico por bay hunto, pero esaki ta exigi dialogo, respet mutuo y boluntad di cooperacion.
Reaccion di Greg Peterson tocante e declaracionnan aki ta pendiente.
Pa mas detaye lesa TREMPAN.
