Dos siman pasa Aruba a biba un dia historico cu e prome edicion di Aruba Activo 2026, un festival deportivo cu a reuni comunidad, federacionnan, organisacionnan y amante di deporte den un ambiente yena di energia, movecion y union.
For di mainta trempan te anochi, Bushiri Beach a transforma den un centro grandi di actividad fisico y deporte, ofreciendo un programa varia pa diferente edad y nivel. E meta principal tabata cla: inspira Aruba pa move mas, conoce diferente disciplina deportivo y stimula un estilo di bida mas activo y saludabel.
Minister di Deporte, sra. mr. Gerlien Croes, a expresa su satisfaccion cu e resultado di e prome edicion y especialmente cu e entusiasmo cu comunidad a demostra.
“Aruba Activo a mustra nos loke ta posibel ora deporte uni un pais. Nos a mira mucha, hoben, adulto y famia completo move, participa y disfruta hunto. Esaki no ta solamente un evento; nos kier crea un movecion cu ta inspira Aruba pa keda activo durante henter aña,” Minister Gerlien Croes a expresa.
E festival a brinda un plataforma importante na federacionnan, clubnan, gymnan y organisacionnan deportivo pa presenta nan disciplina, conecta cu comunidad y motiva mas persona pa incorpora actividad fisico den nan bida diario. Na mes momento, Aruba Activo a pone den evidencia e gran cantidad di talento, conocemento y dedicacion cu tin den sector deportivo na Aruba.
Minister Gerlien Croes ta extende un danki special na IBiSA, tur organisado, federacion, club y organisacionnan deportivo, e grupo di boluntario Believe In Yourself, partnernan, stakeholdernan y tur persona cu di un manera of otro a contribui na realisacion di e evento. Un gradicimento special ta bay tambe na cada participante y famia cu a forma parti di e dia y a contribui na e ambiente excepcional.
E exito di e prome edicion ta confirma e potencial di Aruba Activo pa sigui crece como un plataforma nacional pa promove deporte, actividad fisico, bienestar y un estilo di bida saludabel.
“Aruba Activo no ta solamente un evento; e ta un movecion. Un movecion pa un Aruba mas activo, mas saludabel y mas uni.”
Ministerio di Deporte ta mira bek cu hopi satisfaccion riba Aruba Activo 2026 y ta gradici Aruba completo pa a haci e prome edicion un experiencia inolvidabel.
ARUBA ACTIVO – No solamente un evento, sino un movecion!
