Recientemente e Junior team di landamento artistico di Aruba a biaha pa Panama, unda nan a logra conkista dos medaya y a clasifica pa weganan CAC cu lo tuma lugar na Colombia na juli proximo.
Directiva y miembronan di De Barracudas kier a felicita nos team jong y dynamico cu a logra mantene Aruba su nomber den halto den e mundo di landamento artistico. Tambe kier a duna un palabra di elogio pa coach Alva Torres cu a prepara y guia e atletanan. Pabien na tur!
Mientras cu e team di Junior tawata na Panama, dos di nos atletanan, Xiana Hoo y MariaJose Salazar di categoria Beginners a competi na Coral Springs, Florida na e competencia di “Worldwide Invitational Novice Age Group”. E competencia aki ta midi forsa den muchanan cu ta “nobo” den e deporte di e landamento artistico, y paisnan presente tawata entre otro, Corsow, Republica Dominicana, Colombia, Chile, Mexico, Aruba y USA.
Nos atleta Xiana a logra conkista e medaya di oro pa su rutina solo den categoria di Novice di cual tawatin 55 participante y Maria Jose a titula di 5o lugar den su categoria di cual tawatin 51 participante. Nos ta sumamente orguyoso di e dos damita nan aki y nan trabou desplega. Mas cu claro kier felicita tambe coach Yami cu a prepara y guia e atletanan di comienso te final.
Tambe nos kier a manda palabranan di exito pa e selecshon di 12&U cu ta biahando dia 29 di maart proximo pa Kingston, Jamaica. Nan lo competi na e di 33 edishon di “ CARIFTA Aquatics Championships” designa specificamente pa islanan den Caribe, ta spera mas cu 550 atleta na e National Aquatic Center Kingston.
Nos selecshon di Aruba lo participa cu:
Solo routines di Mikayla Morales y Sofia Cardona,
Duet routines di Mikayla Morales & Zahira Varis y Melanie Tromp & Sofia Cardona
Team routine di Sofia y Silvana Cardona, Abizahi Sanchez, Alina Dirksz, Eva-Elle Gietel, Mikayla Morales, Zahira Varis y Melanie Tromp.
Durooooo!
Ken nos ta?
Barracudas Aruba desde 1974 a introduci e comunidad di Aruba na e bunita deporte di landamento artistico cu e meta principal pa brinda atletanan oportunidadnan pa desaroya y prepara nan mes den e deporte pa competencianan international. Den 2017 a introduci e opcion pa hasi landamento artistico pa recreacion, dunando shownan local un biaha pa aña. Tambe a habri e deporte pa mucha homber por participa mirando e desaroyo den e deporte internationalmente. Pa mas informacion por bishita nos riba Facebook @barracudas.aruba, Instagram Synchro Aruba of Website: www.barracudasaruba.com
