Durante e reunion publico di parlamento a trata e ley di LIM, Landsverordening Instelling Ministeries, e ley di institucion di ministerionan y cu ta defini e tareanan di cada minister nobo den e gobierno actual.
Den cuadro di transparencia y bon gobernacion y tambe mirando cu proximamente lo bay trata presupuesto 2018 mi a haci gobierno 2 pregunta:
- Si por a comparti cu parlamento un lista specifica di tur e diensten cu ta resorta bou cada ministerio mirando e reparticion nobo di e ministerionan, pa asina por tin un miho bista durante e tratamento di presupuesto.
- Adicionalmente, y mirando cu esaki lo ta e di 8 cambio di LIM desde 1986, lo kier a pidi gobierno pa informa parlamento, particularmente durante e ultimo dos gabinetenan, si lo por tawata tin cambio den e cantidad di departamento/diensten di gobierno y si den e LIM actual lo a trece cambio den esaki.
E preguntanan aki no ta solamente pa por compronde miho bou cua ministerio cada departamento ta cay, pero tambe pa por tin miho bista riba posibel caminda unda cu lo por reduci gasto durante tratamento di prespuesto.
Ambos pregunta a wordo contesta durante e reunion y parlamento a ricibi un lista detaya di e diferente departamentonan cu ta resorta bou cada ministerio. Adicionalmente a confirma cu durante Gabinete Eman I y II lo a institui por lo menos 13 departamento/diensten adicional di cual varios tawata “afsplitsing” di departamentonan existente y asina aki ta cuestiona si enberdad esaki lo a hiba na eficiencia of mas bien tawata un ehercicio pa crea mas trabow innecesario.
Durante e tanda di contesta, Minister President, Sra. Evelyn Wever-Croes a contesta cu lo bay haci un esfuerso pa “fuseer” y pues combina cierto di e departamentonan aki of elimina esnan cu no ta cuadra mas cu e vision di gobierno, manera por ehempel “Bo Bario” pa asina por traha mas eficiente y tambe reduci gasto di gobierno.
Despues di un reunion publico di casi 12 ora y mey, a vota na fabor pa pasa e LIM, mirando cu den e constelacion actual di 8 minister y un reduccion considerabel di personal rond di cada minister ya a hiba na un reduccion di gasto di 20.1 miyon florin. Cu esaki gobierno a mustra su empeño pa reduci gasto y hiba un maneho eficiente, transparente y unda integridad y bon gobernacion ta prioridad.
