Diamars ultimo e barco AS Fabrizia mester a yega Aruba cu carga for di Miami. Ta un barco di King Ocean, maneha na Aruba door di Gomez Enterprizes. E barco ta sali diahuebs for di Port of Everglades na Merca y ta yega Aruba riba diamars. Pero e siman aki e no a yega, lagando nos isla cu scarsedad di varios producto, entre otro fruta y berdura.
Parce cu e barco a haya un “engine breakdown” saliendo di Port of Everglades pero a logra drech’e y el a bay Kingston, Jamaica pa tira un mihor bista. Ainda no tin un fecha ki dia e lo sali bek cu e 132 containernan cu e tin abordo pa Aruba. Di tur e carga aki, mas o menos 20% ta container friu.
Companianan di Aruba cu ta depende hopi di e carga aki sin duda ta e agencianan distribuidor, hotelnan, fruterianan y mas. Algun supermercado tambe ta entre e lista di esunnan cu a keda cu scarsedad di producto pa por bende na cliente.
Consecuentemente, varios hotel grandi a pasa cumpra mayoria stock di e supermercadonan pa por garantisa cu nan tin suficiente producto pa por brinda na nan huespednan. Precisamente e ultimo simannan e ocupacion ta halto, pues tabata conta riba e carga aki.
Ta premira cu otro siman, lo tin producto di mas riba mercado pasobra e carga “bieu” lo yega hunto cu e pedido nobo di e siman aki. Ta pronostica cu lo por tin producto cu ta daña of cu mester bende “den pura” prome cu nan daña. Esaki riba su mes por traduci den benta na prijs special y reduci pa por “sali for di e productonan lihe”, segun un experto a conta nos.
