Diabierna mainta a tuma luga un manifestacion di parti di e chauffeurnan di bus chikito den protesta pa no haya atencion oportuno di gobierno den nan peticion pa aumenta e tarifa di pasahero cu 1 florin. Un caravana di e bus/vans a sali for di Linear Park riba L.G. Smith Boulevard direccion pa sede di gobierno. Chauffeurnan a baha y bay na porta pa entrega na Ministernan Ursell Arends y mr. Geoffrey Wever un manifiesto. E documento ta inclui e peticion pa haya un contesta no mas tarda cu dialuna proximo.
Minister Arends, como titular di Transporte a reacciona bisando cu manera el a bisa hopi biaha caba, ta na spera di e resultado di un estudio di Universidad di Aruba riba e efecto cu un aumento den e tarifa di transporte por tin pa e consumidor y e economia. El afirma di tin comprension pa e situacion di e chauffeurnan di prijs y ta personalmente ta sostene nan deseo di un aumento di prijs, pero den mesun rosea a bisa cu esey no por bay asina sin mas.
Como argumento, e mandatario a indica cu si ta concede e aumento na busnan chikito, otro gruponan di sector di transporte tambe lo desea di haya un aumento. Tambe a remarca cu dicho aumento mester bay via di un Landsbesluit y cu esey tin un procedura cu ne. Mas aleu e titular di transporte a indica cu e ta spera cu e proposicion cu e chauffeurnan di bus chikito a entrega na dje ta uno cu ta structural y cu por analisa y lo duna nan un contesta “na un tempo defini”.
Na e ponencianan aki, e representante di e chauffeurnan di bus chikito, Albert Cornelius Angela di Autobus Uni a pidi e minister pa “No compara nos cu taxi paso nan distancia ta cortico y nan prijs ta hopi mas halto. Facil pa bisa esey, pero ora ta den nos zapato bo ta wak. E ruta di San Nicolas ta esun di mas satura,” y enfatisando cu nan ta pasando den situacion hopi dificil.
24ora.com a compronde cu, mientras e ultimo aumento riba tarifa pa taxista ta di 2016, e grupo di bus chikito no a conoce un actualisacion ainda y ta for di 2013 ta boga pa esaki tuma luga. Loke ta nifica no ta djis e aumento di ultimo lunanan nan tin lucha cune, pero di e ultimo casi 10 aña.
