“A base di peticion di Gobierno di Aruba pa contribui na e fondo di ‘Fase’ door di boluntariamente corta den salarionan di gerencia y empleadonan di BCA, a dicidi, for di punto di bista di solidaridad, pa retene e suma di Afl. 377.000 desde di mei 2020 te cu November 2020. Lo deposita e suma cu lo retene e luna aki, esta december 2020, riba e cuenta cu Gobierno di Aruba a asigna specificamente pa e proposito aki, na fin di December 2020”, asina un relato di Banco Central di Aruba ta informa.
Awe Banco Central a emiti un relato di prensa pa aclaria nan posicion relaciona cu publicacionnan cu a sali di entidadnan publico cu ainda no a deposita nada riba e cuenta di Gobierno, pa paga FASE na pueblo. Di e 23 entidadnan di Gobierno, ta solamente 7 a retene y deposita. Den e 7 entidadnan aki, SETAR a deposita mas di 2 miyon florin, WEB mas cu 1.5 miyon florin y SVb mas di mey miyon florin.
Gobierno a bisa ayera, despues di a reuni cu WEB y e sindicato SIWA, cu tur entidad mester a retene parti di salario di trahadonan den forma di solidaridad. Cu si nan a hacie of no, e mandatario no ta sigur pero lo garantisa cu tur ta retene y deposita. Cu e aclariacion di ELMAR, ATA y awo Banco Central, por deduci cu mayoria a retene si, pero no a deposita ainda (despues di 6 luna) riba cuenta di gobierno.
