Den prensa a sali un carta referente e aporte di WEB, esta compania estatal, na e fondo di FASE. Xiomara Maduro, Minister di Finansa, Asuntonan Economico y Cultural, a tene un zoom meeting cu Henriquez di SIWA riba e asunto aki. E mandatario a expresa cu durante e zoom meeting a aclaria algun cos a base di e reunion teni siman pasa na momento cu a notifica nan persona di e carta aki, cu ta den prensa caba. A bin un confusion y sindicatonan a yama pa un reunion cu preguntanan. E tabata kier pa henter pueblo di Aruba tin e splicacion kico ta pasando.
Pa Aruba haya e yudansa di Hulanda den forma di fiansa, desde e di dos tranche di fondonan ricibi na juni, un di e condicionnan ta cu mester corta. Aruba mester mustra di ta solidario cu otro, unda Hulanda a indica cu nan ta pone placa di e pagado di belasting Hulandes. Nan a pone disponibel como fiansa pa Aruba, pero di otro banda kier mira cu Aruba ta haci algo di su parti pa corta den gastonan di gobernacion. Despues nan a bolbe pidi como condicion pa Aruba corta den gastonan di personal, esta e 12.6% y extende esaki pa companianan estatal di Aruba.
Segun Maduro, tanto su persona como Minister President a manda un carta pa companianan estatal pidiendo pa cumpli, como pais, cu e condicion aki. Na momento di a firma ta trata di condicion number 9 e voorwaarden brief y den dje ta bisa cu mester corta e salario. Esaki a conta pa empleadonan publico cu a corta 12.6%, minister- y parlamentarionan 25%. A pidi pa corta den companianan estatal no solamente salarionan di empleado, pero di directornan di Raad van Commissaris. Tur esaki tabata condicion cu a bin den e di dos tranche for di Hulanda, segun e mandatario.
Gobierno di su banda a pidi e companianan estatal pa pasa e suma kita na un cuenta bancario na Banco Central pa un fondo special. Esey ta sirbi como un aporte pa esnan cu e crisis dal mas duro y a hay’e den forma di FASE. E mandatario a enfatisa cu tur 20 compania pidi pa corta a cumpli cu esey. E companianan ta SETAR, Utilidad, Elmar, WEB, Refineria di Aruba, Fuels Marketing Supply Aruba, Terminal di Energia Aruba, Compania Arubano di Petroleo, Aruba Airport Authority, Aruba Ports Authority, Air Navigation Services Aruba, Freezone Aruba, Arubus N.V., Post N.V., Serlimar, Fondo Nacional di Garantia pa Vivienda, Volkscrediet Bank, Aruba Tourism Authority, AZV y SVb.
Den e condicion tin poni tot nader order y esey ta nifica cu e ta keda un condicion riba mesa te ora cu dicidi otro. Pa loke ta stort placa p’e fondo di FASE, shete compania a haci esey. E otro companianan cu no a pone e placa a duna un splicacion dicon no tabata por. Hopi di e splicacion tabatin di haber cu e situacion di compania mes, unda cu si nan saca e suma aki, nan mes lo ta den problemanan y lo contribui na e problemanan cu gobierno tin.
