Diaranson ultimo, Banco Central di Aruba (BCA) a organisa e tercer tayer interactivo di Isla Innovativo. E meta principal ta pa stimula creatividad y fomenta innovacion digital den economia hunto cu varios ehecutivo y director di sector publico y sector priva.
Den e tayernan anterior a enfoca riba e resultadonan di e encuesta Isla Innovativo, unda a presenta e retonan mas grandi pa por realisa transformacion digital. Bayendo pa dilanti, Isla Innovativo lo enfoca riba posibel solucionnan y oportunidadnan social, educativo y economico, teniendo cuenta cu diferente factor nan pero tambe nos ecologia y balor di nos naturalesa.
Den e tres sesion aki a sondea varios proyecto concreto pa asina por stimula innovacion y crea plataformanan colaborativo pa realisa un economia basa riba balornan, conocimiento y tecnologia. Na final di e tayer, a identifica diferente oportunidadnan pa por innova nos pais di un forma creativo, integral y duradero, incluyendo uso di aplicacionnan digital y e introduccion di ‘blockchain’ den sector priva y publico.
BCA ta gradici tur participante un biaha mas pa nan contribucion valioso. Pa keda informa tocante e ultimo desaroyonan di Isla Innovativo bishita y conecta cu e facebook page di Isla Innovativo.
