Banco Central na juni a introduci e biyetenan nobo y mandanan den circulacion. Desde e tempo ey a pensa di traha cu e diferente gruponan den nos comunidad.
Segun Letitia Campbell di Centrale Bank, a bay diferente caminda, por ehempel MFA. A bay Club Kibrahacha pa e hendenan grandi y tambe a pensa riba FAVI.
Na FAVI tin varios cliente cu limitacion visual. Riba biyetenan di e serie nobo tin e elementonan cu a inclui pa e clientenan cu no ta mira of no ta mira bon.
Sesion
E clientenan di FAVI a haya cuater sesion. Cuater siman tur diahuebs. A haya gruponan di mas of menos 12 pa 14 persona. Cada cliente tabata tin un guia cu nan pa guia nan, yuda nan cu e biyete ora cu tabata duna e presentacion.
Algo diferente
E presentacion di Banco Central na FAVI, no a adapta mucho. Tin varios cliente cu no ta full ciego. Tin di nan por mira bon ainda, of por wak parcialmente y riba nan biyetenan a haci por ehempel sesionnan di fula, mirando cu nan tin esey tambe. Tin caminda riba e biyete e cliente por fula pa e sa ki denominacionnan tin.
A haci e elementonan tambe di paga e luz y lusa cu un UV lamp. Hopi cliente a hay’e hopi bon. Pasobra ta cosnan cu nan no a spera. A haci hopi cos interactivo. Cada cliente a haya cinco denominacion pa nan por fula, check y esunnan cu por wak tiki mas miho, mira e diferencianan riba e biyete.
Un experiencia peculiar
Gislaine Rosa-de Cuba, trahado social di FAVI a conta cu e importancia cu Banco Central tabata cerca nan, ta pasobra cu un di nan meta ta pa integra nan clientenan bek den comunidad. Ta hopi importante cu Banco Central por a duna e clientenan oportunidad pa splica nan den placa chikito con e placa nobo ta hinca den otro.
Aporte
Cada cliente ta diferente, segun Rosa-de Cuba. Cada cliente kisas a bay cu un informacion cas. Pero sigur e lo aporta pa esnan cu realmente ta completamento ciego, tin e partinan cu por fula cu kisas den futuro, door di train cu e biyetenan aki, nan por reconoce nan mas facil. E ta traha tambe pa conscientisa, pasobra clientenan di FAVI hopi biaha den pasado, door cu e biyetenan normal, nan tabata dobla e biyetenan. Awo e biyetenan no por machica of dobla na tur manera.
Tambe hopi importante ta, e feedback cu e clientenan ta trece dilanti, cu Banco Central por hiba bek den futuro, con por haci un biyete nobo.
Feedback
Si papia di e feedback mes, e clientenan a laga sa cu e strepi ta un bon idea. Pero debi cu e strepi ta hopi riba otro, e ta dificil pa un dede diki fula. Si mester cera nos wowo, e lo bira un tiki dificil pa identifik’e. Pero si e clientenan tabata hopi contento cu Banco Central por a pensa riba e limitacion cu nan tin. Esey ta bisa cu den futuro lo por bay mira hopi cambio riba e tereno ey tambe. No di Banco Central so, pero tambe di henter nos comunidad, pa tene mas cuenta cu personanan cu limitacion di bista.