Dialuna pasa Parlamento a entrega su comentario y preguntanan pa Minister Otmar Oduber riba e ley pa regla ‘exclusividad y fondonan pa Serlimar’. E ley aki ta den man di Parlamento awor pa wordo trata door di un proceso di pregunta y contesta por escrito y despues un debate entre Parlamento y Minister. Fraccion di MEP a lansa preguntanan asina critico riba e ley di Otmar Oduber cu por conclui cu e fraccion geel no ta convenci cu e ley aki ta sirbi interes general di Pais Aruba. E Parlamentarionan di e fraccion geel ta confronta Minister Oduber di POR entre otro cu su ponencia cu e ley no ta crea un monopolio pa Serlimar mientras cu for di e ley por deduci algo totalmente diferente.
No solamente e hecho cu e ley ta regla exclusividad pa Serlimar pa maneha desperdicio di sushi, Serlimar ta “als enige belast met beheer van afval”, pero tambe e hecho cu e ley ta sigura fondonan miyonario pa Serlimar sin cu Serlimar tin cu duna servicionan a cambio. Tur locual duna servicio pe, Serlimar lo cobra Gobierno, Comercio y ciudadanonan apart.
Pa locual ta e gastonan miyonario cu a explota cu mas di 21 miyon florin desde cu Minister Otmar Oduber ta encarga cu Serlimar, e Parlamentarionan ta lansa un cantidad grandi di pregunta pidiendo pa cuentanan anual detaya, business plan, un hustificacion detaya di tur e gastonan haci, verificacion door di accountant y/of algemene rekenkamer, detaye di e cantidad di personal den servicio di Serlimar den aña 2017, 2018 y 2019, detaye di e salarionan mara na cada funcion, como tambe detaye di contractnan cu provedornan di e compania, manera e contract di lease di truck, obteni recientemente door di Serlimar.
Tambe e Parlamentarionan ta haci un cantidad grandi di pregunta riba e plannan y hustificacion di e Minister pa bin cu un Incinerator. E fraccion ta cuestiona e hecho cu ya caba ta papia di Incinerator den e ley aki, mientras cu ta leu di tin e hustificacion cla pa esaki.
E Parlamentarionan di MEP a haci asina hopi pregunta cu e la ocupa 13 pagina, mas cu cualkier otro fraccion, mientras e fraccion di e partido di e Minister, POR, no a haci ningun pregunta!
Minister Otmar Oduber lo tin cu contesta e preguntanan haci door di e Parlamentarionan di tur fraccion den e dianan nos dilanti, pero e indole di e preguntanan haci door di e fraccion geel ta lanta interogatorio si e Minister tin e capacidad di convence e Fraccion di mas grandi cu ta sostene Gobierno cu e ley aki ta uno cu lo sirbi interes general.
