Tanto Dr. Horacio E. Oduber Hospital y Instituto Medico San Nicolas (ImSan) ta comprometi pa promove mas cooperacion, eficiencia y productividad, den un esfuerso pa reduci gastonan di operacion y aumenta calidad di cuido riba nos isla. Na cabes di e ekipo cu lo facilita e proceso a apunta Ronald van Trigt, persona di confiansa di Minister Dangui Oduber. Den pasado el a ocupa otro rol tambe den maneho na Hospital, pues conoce e cultura di e fundacion y sa con por maneha un miho cooperacion cu ImSan den unda e pashent ta sali e gran ganado!
Drs. Joel Rajnherc, director di ImSan a comenta cu hospital tin problema pa sigui cu e construccion debi na scarsedad di cama disponibel pa pashent. Den e cuadro ey mes, awor e dos institutonan medico lo evalua con ImSan por sac’un man y yuda hospital cu cama pa pashent por keda interna cerca nan, durante e periodo cu ta caba cu renobacion y ampliacion di hospital.
Di un otro banda, Ronald van Trigt a menciona cu e palabra fuseer no ta riba mesa, sino mas bien ta un cooperacion intenso. Na final di dia no sa si tur dos lo cay bao di un solo capa. Tur esaki un grupo externo lo ta analisa. Pero primeramente ta sigui traha manera cu a bin ta trahando pa mira con ta mehora e cuido na un prijs pagabel.
Director di hospital, Jacco Vroegop a comenta cu nan kier claridad y un luga di trabao, caminda cu nan por desaroya. Na final kier percura reenforsa e calidad di cuido na Aruba.
Dr. Rajnherc a menciona cu mientrastanto kier brinda e miho servicio posibel. ImSan ta bezig cu un JCI Accreditarion, cual ta un nivel halto di cuido cu nan kier brinda y no por tin ningun obstaculo pa logra esey. E cuido cu ta duna hunto, tin cu sigui mehora y caminda cu por coopera intensivamente pa mehora e cuido p’e pashent y pa esaki keda pagabel, ta loke cu ambos institucion kier pa sigui cu ne.
Di nos propio investigacion, nos a compronde cu riba dia 13 di december proximo lo firma un acuerdo, den forma di un Memorandum of Understanding (MoU). Lo acorda den e acuerdo aki di lo traha intensivamente pa miho cooperacion cu miras pa mehora e cuido, baha gasto y purba maneha e reto di scarsedad di cama disponibel den hospital.
Y den e trayecto aki lo uza un partido externo pa, durante 4 pa 6 luna, investiga te con leu e cooperacion por conduci na un fusion entre HOH/ImSan. E peticion na e partido externo aki ta pa analisa kico ta e aspectonan positivo y esunnan negativo pa cu e fusion. Esaki lo mester presenta den un rapport final, cu lo ta escencial den e decision cu si lo pone e dos entidadnan aki hunto bou di un solo capa y organisacion.
Di otro banda AZV, esun cu ta cubri mayoria gasto di tanto HOH como tambe ImSan, ta convenci cu e cooperacion entre e dos entidadnan aki of un posibel fusion lo por traduci den un reduccion di gastonan directo di no menos cu 5 miyon florin pa aña. Esaki sin duda lo ta bonbini cerca AZV, cu ya tin un ordo di Gobierno di Aruba y di Hulanda, como condicion pa prestamo pa pais Aruba, cu nan mester reduci nan presupuesto cu no menos di 60 miyon florin anualmente. Ya e aña aki, e prome aña di e acuerdo, a laga gobierno sa cu lo no por cumpli cu e peticion ey y cu mas cu lo por spaar e aña aki lo ta 40 miyon florin. Esaki ta por lo menos un di e motibonan cu Gobierno di Hulanda a uza pa nenga Aruba e sosten di likides financiero den e ultimo kwartaal di 2021.
