Comision Nacional di UNESCO (United Nations Educational, Scientific and Cultural Organization) Aruba ta anuncia cu individuonan y organisacionnan den nos comunidad, preferiblemente institutonan no-gubernamental, por entrega proposicion di proyecto nobo pa bin na remarca pa subsidio den cuadro di e Programa di Participacion di UNESCO pa e periodo 2020-2021. E ultimo fecha pa entrega un proposicion di proyecto pa e periodo aki lo ta diaranson 12 di februari 2020. Tuma bon nota di e fecha aki pa asina tur proyecto cu ta cumpli cu e rekisitonan por wordo entrega na tempo na e oficina internacional di UNESCO na Paris.
E proyectonan mester ta dirigi riba e prioridadnan principal cu e organisacion di UNESCO a pone su dilanti pa e añanan 2015-2030 y mester ta riba un (of mas) di e terenonan di trabou di UNESCO cu ta: enseñansa, ciencia, cultura, comunicacion y informacion. Ta invita comunidad en general pa entrega proyectonan concreto cu ta contribui na e creacion di capacidad di nos pais pa logra e metanan y prioridadnan actual di UNESCO cualnan ta: igualdad di genero, eradicacion di pobresa y empoderamento di hoben pa nos por realisa paz y desaroyo sostenibel, inclusion social y dialogo intercultural.
Pa mas informacion general y tambe tocante e condicionnan por tuma contacto cu e Secretaria General pa e Comision Nacional di UNESCO, Zetsia Ponson, via [email protected]. Tambe por consulta e siguiente link pa tur condicion y rekisito adicional pa entregamento di un proposicion pa proyecto:
http://www.unesco.org/new/en/member-states/mscontent/participation-programme
Si ta desea di ricibi asistencia y conseho con pa hinca e proyecto den otro tambe por manda un mail pa [email protected] pa haci un cita. Consulta e pagina di facebook di UNESCO Aruba pa keda na altura di informacion nobo.
PROGRAMA DI PARTICIPACION 2020-2021
Instancia, organisacion y individuonan por entrega un peticion pa subsidio di un proyecto den cuadro di e Programa di Participacion di UNESCO.
CRITERIONAN PA SUBSIDIO
- E aplicante mester ta un ‘rechtspersoon” (fundacion, institucion, asociacion, NGO of otro organisacion). Hunto cu e aplicacion mester inclui un documento oficial (statuut) di e status aki.
- E aplicante mester suministra informacion tocante aplicacion na of contribucion di otro financiamento pa e proyecto.
- E aplicante mester ta estableci /biba (legalmente) na Aruba.
- Cada organisacion por aplica solamente un biaha pa subsidio pa un proyecto durante e “biennium” (periodo di dos aña) 2020-2021.
- E proyecto mester ta acompaña pa un presupuesto balansa, den cua e gastonan di honorario (sueldo) y eventual biahamento, no ta surpasa 1/3 (un tercera) parti di e presupuesto.
POR HACI PETICION DI SUBSIDIO PA
- asistencia tecnico, servicio di specialista
- compra di ekipo (limita, exclui vehiculo)
- subsidio pa estudio specialisa (post-academico)
- publicacion, documentacion, traduccion y
- reproduccion
- organisa conferencia, seminario, training, curso etc. riba un di e terenonan di trabou di UNESCO.
SUMA SUBSIDIABEL
Pa proyectonan local, UNESCO por otorga un subsidio maximo di US$ 26.000. Pa proyectonan subregional of interregional, UNESCO por otorga un subsidio di maximo US$ 28.000. Pa proyectonan regional UNESCO por otorga un subsidio di maximal di US$ 38.000. Pa proyectonan regional y interregional tin otro condicionnan aplicabel.
CONTENIDO DI UN PROYECTO
- nomber di e proyecto
- descripcion completo na ingles di e proyecto
- nomber di aplicante
- E agencia pa maneho y ehecucion di e Proyecto
- Origen, hustificacion y estudio di viabilidad di e proyecto
- E obhetivonan di e proyecto
- Descripcion di e producto final cu lo ser entrega
- E skema di tempo pa ehecucion di e proyecto
- Presupuesto completo y detaya incluyendo ofertanan
- Peticion pa subsidio di UNESCO cu un specificacion:
- den caso cu tin mas subsidiante of co-financiadornan, mester identifica esakinan
- den caso cu ta trata un proyecto regional of interregional, mester identifica e otro Comision(nan) Nacional cu ta envolvi.
ULTIMO FECHA PA ENTREGA UN APLICACION TA DIARANSON DIA 12 DI FEBRUARI 2020
Aplicacionnan entrega despues di e fecha aki lo no por wordo trata mas. E Comision Nacional di UNESCO Aruba ta e organo cu ta dicidi cua proyecto ta keda aproba pa manda na e oficina principal di UNESCO Paris y ki prioridad e proyecto aki tin pa Aruba.
Esaki ta ser haci a base di criterianan stipula pa e Comision, den cua ta tene na cuenta cu maneho di gobierno di Aruba riba terenonan competente di UNESCO (educacion, ciencia, cultura, informacion y comunicacion) y maneho di UNESCO como organisacion internacional.
Tur proyecto ta mara na e Principio y Condicionnan cu ta dirigi e Programa di Participacion y cu por ser haya den e documento “CL/4301 – Participation Programme for 2020-2021” cu lo keda adopta pa e Conferencia General di UNESCO na luna di november 2019.
