Cada dies aña Oficina Central di Estadistica ta haci un conteo di poblacion y vivienda, conoci como Censo. E idea di Censo ta pa conta tur esnan cu ta biba na Aruba. E proposito general di e Censo ta pa contesta tres pregunta cardinal: cu ken nos ta, cuanto nos ta y con nos ta biba.
Apart cu ta aña di Censo, e aña aki ta comienso di e decada di implementacion di desaroyo sostenibel (SDG’s). CBA a duna su aporte den esaki pasobra Censo ta wordo uza como instrumento principal pa colecta data, cu ta encera na e calculacion di indicadornan di SDG’s.
Aki tin tur metanan di SDG’s y datonan cu ta relaciona cu educacion, economia, pobresa, y diferente otro tema cu lo bay haci pregunta den Censo, pa e grupo SDG’s por haya data pa nan por calcula con e indicadornan ta na Aruba.
Censo ta bay tuma luga for di prome pa 10 di october 2020. Tin aproximadamente 47 punto di adres cu e tellernan lo bishita. A haci un veldwerk aña pasa, caminda cu a bay cas pa cas, mira cuanto adres tin compara cu 2010.
Por ehempel tabata tin adresnan cu tabata cas y awo a bira ruina. Un ruina a remodela y a bira un hogar. A haci full un chekeo di Aruba, pa tin un idea cuanto hogar mester acerca. Te awor aki ta 47 mil. Pa april of mei lo haci un miniveldwerk atrobe.
Compara cu juli cu a haci e veldwerk aña pasa, ta visibel cu a bin mas cas acerca. Esaki ta pa tin un idea cuanto punto di adres lo bin acerca pa 2020. Te awor aki tin por lo menos mil teller pa por haci e Censo. Di e preparacionnan por bisa cu CBS ta acerca diferente compania den e parti di mercado, pa por informa pueblo miho posibel, tur loke ta relata Censo 2020, principalmente e importancia di e Censo mes y tambe informacion di e topiconan cu nan por haya den e cuestionario y ki preguntanan por spera durante e cuestionario.
CBS ta bezig cu e website di Censo 2020 p’asina haya informacion di tur loke cu tin di haber cu e Censo, pero tambe informacion di tur otro Censo haci desde 1960 bin ariba.
Di e test cu a haci den luna di october aña pasa, un di e puntonan cu a bin dilanti ta cu e hendenan ta prefera pa tin un lista di informacion riba e preguntanan prome cu e teller yega nan cas. Esaki pa nan ta miho prepara. Por ehempel principalmente si ta trata preguntanan riba fecha y grandura di cas, etc. Esaki pa e proceso bay den un forma mas eficiente. Algo manera un checklist di informacion pa nan ta miho prepara.
Compara cu 2010, ta bay tin solamente cinco telcenter den e Censo aki. Aruba ta wordo parti den cinco seccion: San Nicolas, Santa Cruz, Paradera, Oranjestad y Noord. Ta buscando un localidad central, caminda cu personal di CBS lo t’ey durante full e Censo. Esey ta haci cu e teller no mester yega te na Sun Plaza pa informacion.
Cada teller ta wordo asigna na e telcenter cu ta pertenece na su area cu nan tin cu bay y cu lo ta mas accesibel tambe si por ta pueblo mes tin pregunta of mester di mas splicacion, nan tambe por yega na un di e telcenternan aki.
Esun central ta bay ta na Sun Plaza, pero tambe ta bezig ta check localidad den e areanan asigna na Aruba y tambe un otro area central cu por ta accesibel pa tur hende tambe.
Pa awor tin mester di 1000 teller y riba 200 teller di reserva. E planning ta pa e tellernan cuminsa traha riba e Censo desde juni y juli, cu lo tuma contacto cu nan. Tur esnan cu kier aplica pa bira un teller, tin formulario di inscripcion riba website di Censo.
Desde cu a cuminsa cu e pilot aña pasa, esaki a keda riba e website y por aplica online.
