Tur cos ta cla pa e gran evento di Camara di Comercio y Industria Aruba (KvK) esta e ‘Aruba Chamber Business Event’ pa e edicion di 2019. Esaki lo ta awenochi dia 27 di September den e ballroom di Aruba Hilton Caribbean Resort cuminsando pa 7.30 di anochi. Awenochi lo ta un anochi sumamente valioso pa cada empresario pero tambe persona involucra cu negoshi unda cu oradornan lo trata varios topico di interes.
E anochi lo sigui cu un momento pa ‘network’ den un forma ameno cu un banda musical acompaña cu ‘open bar’. Ainda tin algun carchi disponibel na Camara di Comercio y online via www.arubachamber.com. Si resta lo tin algun disponibel na porta.
Pa e edicion aki KvK ta sumamente orguyoso di por introduci sr. Carl Gould for di Merca como invitado internacional pa bin duna un presentacion. Sr. Gould ta un empresario sumamente respeta mundialmente y a traha pa companianan grandi manera Wal-Mart, Walgreens, American Idol y hopi mas. Tur esaki ta relaciona cu su habilidadnan empresarial cu a hibe na bira un profesional cu ta yuda companianan crece. Durante e evento na Aruba e lo comparti varios strategia con pa ta exitoso den un mercado cu tin su retonan.
Di Aruba tambe lo tin un orador cu ta sr. Frans Ponson. Sr. Ponson tin un experiencia amplio den e mundo di negoshi na Aruba y lo comparti su storia di retonan y exitonan den bida. Aki sigur e publico presente lo por haya varios ehempel cu lo ta efectivo den nan propio organisacion.
KvK kier gradici CMB, Ennia cu ta sponsors di “Aruba Chamber Business Event 2019” y un danki na Aruba Hilton Caribbean Resort pa e colaboracion ricibi. E evento no ta destina solamente pa e doñonan di negoshi of miembronan di e ekipo di maneho pero tambe pa esnan cu tin influencia riba e exito di e organisacion. Awendia ta hopi importante pa keda innova pa por keda competitivo den un mercado cu constantemente ta desaroya.
E entrada ta inclui e parti di presentacion di e dos oradornan y 2 ora di networking acompaña pa musica di ‘NFuzion y un open bar.
