Ta remarcabel cu e conseho di e colegio di supervision financiero, CAFT, ta recomenda Gobierno di Reino p’e duna Gobierno di Aruba un “aanwijzing” si mira e resultadonan financiero di Gobierno di Aruba e aña aki. Pa e prome 6 lunanan di 2019 Gobierno di Aruba ta raporta un surplus di casi 100 miyon florin. E mesun colegio di supervision financiero den su ultimo reaccion riba e di dos “uitvoeringsrapportage” ta pronostica cu Gobierno di Aruba lo cumpli cu e normanan financiero e aña aki. Kico por tin tras di e decision pa duna un ‘aanwijzing’ si Gobierno ta cumpliendo cu e normanan stipula den e protocol Hulanda-Aruba di november aña pasa?
E version oficial di CAFT den su carta na Parlamento ta cu:
- Gobierno lo por surpasa e maximo na gastonan salarial di empleadonan publico acorda den e protocol entre Aruba y Hulanda y
- Cu Gobierno falta duna claridad riba e plan di reforma di impuesto – den otro palabra Gobierno falta duna claridad riba e medidanan cu tin cu wordo tuma ainda – e asina yama belastinghervormingsplan (bhp).
Sinembargo tur esaki ta cosnan di futuro. Actualmente Gobierno ta cumpliendo y como tal Minister Xiomara Ruiz-Maduro, na prome bista, tin rason di indica cu CAFT ta prematuro den su conseho pa duna un aanwijzing.
E motibo real por wordo busca den e confrontacion actual entre Aruba y Hulanda crea pa e amienda di Parlamentarionan Ady Thijssen y Rocco Tjon riba e ley di CAFT. E discusion formal entre Gabinete Wever-Croes y Hulanda ta riba e legalidad di e supervision financiero despues cu Fraccion di MEP a cambia e hirargia di supervision den su totalidad. E cambionan di MEP a haci cu e ley a bira contrario na e palabracionnan haci entre Knops, Wever-Croes y Ruiz-Maduro.
Gabinete Wever-Croes ta purbando di convence Gobierno Hulandes cu e amienda di Parlamento no tin ningun consecuencia pa e funcionamento di e supervision financiero. Pa e motibo aki nan a skirbi un carta extenso na Staatssecretaris Raymond Knops. Gabinete Wever-Croes ta argumenta cu e base legal ta:
- E protocol firma entre Hulanda y Aruba hunto cu
- E ley di supervision financiero sin e cambionan cu Parlamento a presenta
Door di recomenda un aanwijzing basa riba e protocol y e Ley di CAFT sin cambio, organo di supervision financiero ta cuminsa ‘test’ e legalidad di e areglo di supervision financiero cu Gabinete Wever-Croes ta bisa cu ta conta pa nan. Si berdad e base legal ta manera Gabinete Wever-Croes ta indica, Gobierno di Aruba lo ricibi un ‘aanwijzing’ via un Koninklijk Besluit forsando Gobierno pa atende cu e dos puntonan menciona den e carta di CAFT, esta e gastonan di personal y claridad riba e medidanan cu lo wordo tuma.
Si e base legal no ta manera Gabinete Wever-Croes ta indica y Conseho di Minister di Reino no por duna Gobierno di Aruba un aanwijzing pa cumpli cu e dos recomendacionnan aki; Lo confirma cu falta un punto di referencia legal di e supervision financiero cu Hulanda y Gabinete Wever-Croes ta desea. Na e momento ey Reino lo por forsa Gobierno di Aruba pa crea e base legal aki door di presenta un otro ley na Parlamento di Aruba of Reino cu lo tin tur e ingredientenan necesario pa por efectua e supervision financiero necesario.
Den pasado a yega di menciona e posibilidad di crea e base legal aki por medio di un Algemene Maatregel van Rijksbestuur of un Rijkswet. Den tur dos caso, ta parce cu CAFT lo bay logra su meta y como tal a logra changa Gabinete Wever-Croes cu e recomendacion pa e aanwijzing aki.
Mirando e comentario di Ady Thijsen awe den prensa indicando cu CAFT no tin ningun base legal pa duna un aanwijzing, ta parce cu en todo caso e Presidente di Parlamento di Aruba, no ta compronde e situacion financiero y/of e situacion den Reino pa cu supervision financiero cu ta forma parti di e strategia di CAFT.
