E tema di nos economia ultimo tempo ta pone nos pensa hopi biaha riba desaroyo di hotel rond di nos isla. E crecemento rapido cu Aruba su turismo ta pasando aden, dus sin laga afo e gran cantidad di construccion di hotel y condominio cu tin andando, casi sin limite. Nos a puntra lider di fraccion AVP, Mike Eman, kico ta e postura di e partido berde riba e tema di ‘NO MORE HOTELS’ cu ta den boca di pueblo ultimo tempo. Eman ta bisa cu nan tambe ta hopi convenci cu Aruba a yega hopi tempo caba e punto di saturacion tanto pa locual ta trata peso ecologico riba e isla como e parti economico.
Segun e lider di e fraccion, si bo mira cuanto di nos naturalesa cada bes tin cu sacrifica pa por substancia un economia cu ta keda crece a base di expansion di turismo. Banda di e presion ecologico, tin cifranan macro economico cu ta mustra cu e expansionnan aki ora di midi rendimento per capita pa cada persona den nos comunidad. “Si bo mira con cada un expansion grandi asina ta haci cu abo tin cu traha mas caretera, tin mas servicio basico cu gobierno tin cu provee den un comunidad cu ta crece a base di e crecemento di turismo den su capacidad. Nos ta kere nos tin cu bay enfoca – locual nos gobierno tabata haciendo – riba un turismo cu ta crece den calidad y no necesariamente den cantidad.”
TUR DIA TIN MAS HOTEL TA LANTA
Bo por saca mas rendimento for di e mesun cantidad di hotelnan ora cu bo mehora e producto Aruba. Y p’esey AVP ta lamenta loke ta pasando na momentonan aki riba nos pais. “Si tin algo cu nos partido a inverti aden durante nos ocho aña di gobernacion, ta calidad di producto.” E ta papia cu pa ora turista a yega Aruba e tabata mira infrastructura, limpiesa, na Waf a kita containerhaven pa pone un Waf bunita cu Welcome Plaza. E ta sigui na bisa cu nan a inverti mas di 25 miyon florin pa haci e area bunita, embeyece henter Aruba, pa asina e ora ey bo por haya mas rendimento for di e turista cu ta bin. Pasobra asina e turista ta midi y bisa cu por ta e ta paga mas cu 100$ pa e camber, pero e producto cu e ta haya ta un producto miho cu e otro islanan.
VARIOS COS CAYENDO DEN OTRO
“Lamentablemente, e gabinete aki a laga henter e vision ey cay. Mi ta mira tur dia mas hotel ta lanta, cada bes ta gobierno anterior su culpa. Pero ta bao di nan gobierno tur e hotelnan ey ta lantando, y nos no ta mira e inversion den calidad mas.”
El a reuni cu trahadonan di Serlimar recientemente y cu contratistanan cant’i caminda, unda cu nan ta bisa cu nan salario a baha tambe di 11 mil pa 8 mil florin. “No tin e animo mas pa haci limpiesa na pais Aruba manera anteriormente, y nos no ta wak nada di embeyecemento. Unda bo wak, edificionan ta biniendo bek na ruina, monumentonan bunita cu nos a traha y construi ta cayendo, parkenan di recreacion cu nos a traha ta cayendo. E gobierno aki no ta realisa cu tin avenida alternativo pa crece den calidad y no mas den cantidad.”
