Dia 19 di februari un avioneta a cay den e area di Alto Vista, algo cu no ta un custumber cu ta pasa na Aruba. Den e avioneta cu a cay tabatin 1 piloto y 1 pasahero abordo. Departamento di Aviacion Civil tin diferente rol den e investigacion cu a cuminsa mesora. Segun Edwin Kelly, Director di Departamento Aviacion Civil, nan ta cay den e sistema cu Rampen Bureau como ‘first responders’ pero tambe pa cuminsa e investigacion di accidente.
Loke cu Aviacion Civil a haci dia cu e avioneta a cay tabata perserva e evidencia y inicia e investigacion asina cu Brandweer a caba cu nan tarea di rescate. Cada pais, segun reglanan aereo, ta responsabel pa haci e investigacion di cada accidente cu pasa den nan teritorio. Tambe ta obliga pa informa diferente pais manera NGSB, door cu e avion ta registra na Merca.
Den aviacion tin 2 tipo di investigacion cu ta cuminsa ora di accidente, cual e prome ta investigacion di siguridad y e otro ta investigacion penal (strafrechtelijk). En caso cu no tin niun indicacion di nada penal, pero esun di siguridad ta prevalece y completa y e otro banda mesun cos.
Pa prome biaha e avioneta aki a bin Aruba y Aviacion Civil tin tur informacion con nan a haci e vuelo, kico nan a bin haci. Tur esey ta ‘background information’, pero loke cu ainda e departamento ta ocupa cun’e ta e causa y colabora esey cu diferente evidencia cu nan a haya tanto riba avion como declaracion tuma for di testigonan y personanan envolvi. E caso ta algo normal, kiermen nada for di sla, segun Edwin Kelly.
E piloto ta na Aruba ainda y ta coopera hopi bon cu Aviacion Civil. Casi tur dia e ta presente pa por termina cu e declaracion oficial y awe un biaha mas e tabata cerca nan. “E ta bayendo bon,” segun Edwin Kelly. E ta importante p’e piloto pasobra seguro ta haci su investigacion y p’e piloto, mas e coopera mas e chens ta cu si algo a bay fout menos chens e tin pa perde su lisencia.
Aviacion Civil tin tur informacion di e piloto, e tin experencia. Asina mes e team investigado di Aruba kier ta sigur cu su declaracion ta cuadra cu e evidencianan, pa yega na e motibo real dicon e avion a cay. Den un comunicado di prensa a sali cu e probabilidad ta hopi grandi cu combustibel a caba y loke e departamento ta haciendo awo ta buscando mas evidencia pa colabora esey. Tur cos ta mustra cu ta bayendo den e direccion ey si!
