Durante dia di awe tabatin varios reunion den Cocolishi, despues cu a sali na cla e decision di Corte di Empleado Publico, relaciona cu e caso cu Kathy Ruiz-Paskel, director di DIMAS, a entrega y a gana contra Minister Glenbert Croes. E echo cu hues a dicta na varios ocasion cu, deliberadamente, minister ta actua contra ley, ta rekeri consecuencia politico. Pero ta parce cu e consecuencia no ta bin solamente di oposicion, sino den mesun seno tambe ta evalua con ta atende cu e realidad aki di mal maneho y falta di integridad den proceso di otrgamento di permiso di estadia y di trabou.
Minister Glenbert Croes, como e minister responsabel pa e maneho di DIMAS, lo mester duna cuenta den Ministerraad pa loke ta e decision di hues den e “voorlopige voorziening”, den cual a destrui e decreto ministerial di e minister, basa riba erornan legal haci y trapamento riba derecho di empleado publico. E mandatario a insisti cu e ta manda y e por kita y pone director na su antoho, pa cual corte a par’e den seco. Minister Glenbert Croes a kita e poder di Kathy Paskel, of mas bien, a hal’e un banda como director di DIMAS y a instala un Management Team (MT) na su luga.
CASO PASKEL
Tabata dia 10 di maart ultimo e minister encarga cu DIMAS por medio di un Decreto Ministerial a duna Mario Wever mandato pa dicidi riba peticionnan di admision y obhecionnan. Tambe riba 10 di maart a institui via di un Decreto Ministerial un Management Team cu ta keda encarga cu e maneho diario di DIMAS. Dia 15 di maart a traha otro Decreto den cual a adapta e prome MB di tal forma cu e ta controla e maneho diario di DIMAS. E mando di operacion diario ta duna cuenta na e MT, cu ta esun cu ta duna conseho, guia y maneho na DIMAS.
E director di DIMAS, mr. Kathleen Paskel-Ruiz, a bay den obhecion contra e MB-nan aki dia 11 di april 2022. Pero dia 8 di april caba Paskel a pidi hues duna su opinion riba e obhecion cu el a entrega. Un ambtenaar por pidi na tur momento un decision adelanta di hues (ambtenarenzaken) ora cu tin un obhecion entrega. Esaki ora cu e tema di e obhecion ta perhudica e ambtenaar en cuestion y no por warda pa tratamento di e caso completo.
Dialuna a trata e caso, cual a sali na fabor di Kathy Ruiz-Paskel. Hues a conclui cu e decision tuma door di e minister ta contra ley y cu den bodemprocedure e lo no tin base tampoco.
NO TIN MINISTERRAAD
Na salida di Cocolishi a acerca Minister Ursell Arends riba kico tin di berdad cu a trata e tema di e caso Kathy Ruiz-Paskel contra Minister Glenbert Croes den Ministerraad y kico lo por a sali afo di e reunion aki.
Riba esaki e minister tabata masha breve, unda cu el a desmenti cu diaranson tabatin Ministerraad, ya cu Ministerraad ta solamente riba diamars y diabierna. Pero nos fuentenan ta sigura cu a atende e caso aki awe ampliamente. Locual si por a pasa ta, cu a reuni entre e ministernan di MEP so y no a inclui nan partner den coalicion, Raiz.
OPOSICION KIER REUNION PUBLICO
Awe e fraccion di MAS y Accion21 a manda un carta na presidente di Parlamento di Aruba, den cual ta solicita un reunion publico riba e topico specifico aki. Den e peticion, firma pa Marisol Lopez-Tromp, Aquanette Gunn y Miguel Mansur, ta pidi pa un reunion cu caracter di urgencia, pa aclaria e consecuencia di e sentencia di hues, den e caso cu director di DIMAS, mr. Kathleen Ruiz-Paskel a entama contra Minister Glenbert Croes. E dos fraccionnan den oposicion ta desea pa e minister mes tambe ta presente den sala di Parlamento pa defende y hustifica su maneho. Es mas, e titulo di e peticion ta bisa “De uitspraak van 30 mei 2022, GAZA # AUA202200988 die de onwettige handeling bevestigt tegen mw. mr. Kathleen Ruiz-Paskel en de gevolgen van de geschorste bestreden beschikkingen voor Minister van Arbeid , Energie en Integratie, dhr. Glenbert F. Croes”.
HISTORIA TA RIPITI
Ta parce cu tempo ta pasa y pa un of otro motibo, e mesun politiconan ta sigui haya nan mes den e mesun problemanan di tur tempo. Den gobernacion AVP-OLA tambe Minister Glenbert Croes a hay’e bou investigacion pa zeebrieven y lucht brieven, te cu na un dado momento, despues di eleccion, gobernador a declara cu e no ta ministeriabel. Aunke cu, oficialmente, e motibo cu Croes no por a bira minister tabata debi na su relacion “mucho estrecho” cu famia Mansur, net prome cu nan extradiccion. E tempo aya ta su ruman Junior Croes mester a bira minister p’e y despues Willem Vrolijk a tuma e funcion over. E tempo aya, MEP tabata pidi pa kita e pen for di dje pa evita cu e ta hinca su mes den mas problema. Despues di tanto aña, ata atrobe e ta haya un di tres chens pa bira minister y e ta hay’e den e mesun tipo di problemanan cu integridad di su tumamento di decision y firmamento pa loco!
MOCION DI DESCONFIANSA NA CAMINDA
E temor den Partido MEP ta si Glenbert Croes lo por sobrevivi un mocion di desconfiansa den Parlamento. Esaki pasobra cu e coalicion cu ta sostene Gabinete Wever-Croes II ta conta cu net 11 miembro, cu ta un mayoria limita. E ta haci e proceso masha peligroso pasobra ta un colega di partido of un colega di Raiz mester vota na fabor of no presenta pa e reunion, por hinca e mandatario den problema cu su trabou y por haya retiro “op staande voet”. No ta algo usual cu ta sosode riba nos isla y por corda cu e ultimo minister cu por poco a haya su retiro asina tabata Marisol Lopez-Tromp pero no a logra. Cu e falta di integridad cu ta demostrando awor den tumamento di decision, e chens ta mas grandi cu Glenbert Croes lo por bira e prome y asina pone e relacion MEP-Raiz bou hopi presion. Den MEP kier evita e berguensa aki y conseha Croes pa e tene honor na su mes, pero no ta un proceso facil y e no tin apetit pa e idea aki tampoco.
POSICION TA COLGA NA UN HILO
No ta prome biaha, pasobra tempo cu a firma e acuerdo di Eagle LNG caba tabatin plan pa ‘bula cabes’ di Minister Glenbert Croes, debi na presion interno den coalicion. E tempo ey e mandatario a dicidi di laga firma e contract cu WEB adelanta, manera cu nos a informa den forma di primicia, y despues e invita e partner den coalicion pa un evento cu mas bien tabata un “show”. Raiz no a aprecia esey y a expresa esaki publicamente cu a causa cu MEP a evalua pa laga Croes cay den e proceso. Na final el a scapa e dia ey, pero awor at’e den problema atrobe cu su forma di tuma decision, den cual corte mester a corigie.
Specialmente for di e angulo di husticia tin tur wowo riba dje, pa sea e tuma honor na su mes, of e por hay’e den problema cu posibel investigacion penal rond di henter e proceso di otorgamento di permiso di estadia y trabou, den cual personanan yega na dje, ta den posicionnan clave pa dicidi riba e permisonan aki. Ta obvio cu e maneho di stranheria awor ta wordo dicidi den Cocolishi, locual ta precisamente loke den pasado a hinca otro ministernan den basta problema penal cu husticia.
