Un situacion cu te na e momento aki no a atende cu ne. Si no ta awa di pos ta awa limpi cu ta yena henter e area dilanti parlamento. Den careda di 9:30 pm mientras reunion ta andando den sala di parlamento, a tuma nota cu parti pafo ta yen yen di awa te cu esaki tabata yegando dilanti Renaissance Hotel.
Automobilista tabata pasa y spart awa cada biaha cu pasa. Esaki a forma un molester sigur pa tanto local como turista cu ta frecuenta e area. Segun por a tuma nota, cu ta un tubo net dilanti porta di parlamento lo a kibra of hende a kibra esaki y for di akinan e awa tabata choria bay te riba caminda grandi di L.G. Smith Boulevard.
Remarcabel ta cu pa un situacion asina, na mas di un ocacion e cuidadano comun ta ricibi un multa na momento cu bin topa cu awa, tanto awa sushi, di wasmashin of cualkier otro tipo cu ta laga bay riba caminda. Polis ta presenta diariamente na diferente adres rond nos isla y reparti multa na e cuidadano den un situacion asina aki.
Esaki no ta prome biaha y ta haya straño cu te na e momento aki ningun hende of departamento concerni no a bin pa atende cu e situacion. Un desaster completo tin pafo mientras parlamentario como tambe e mandatarionan ta paden atendiendo cu reunion. Nan vehiculo para pafo ta haya sota di awa ora cu e trafico ta pasa pafo.
Ta spera cu mas lihe posibel nan bin drecha e tubo aki pasobra mientrastanto ta gastamento di awa cu ta gastamento di placa di pueblo, ta tumando luga. No por warda te mainta y laga awa keda core asina aki. Ta basta ora caba e tabatin ta core y entre mas tarda ta pio e situacion lo bira.
