CrisisTeam aa informa cu pa motibo di e aumento drastico di casonan di Covid, Hospital ta escala y ta cancela tur cuido electivo. Lo atende solamente casonan di urgencia pa asina por traha capacidad y espacio pa atende cu pashentnan di Covid. Dr. Horacio E. Oduber Hospital ta lamenta cu mester a tuma e paso aki, sinembargo ta un paso necesario pa por garantisa cuido di tur cuidadano.
Ta hasi un apelacion riba tur cuidadano, pa no acudi na Hospital pa cuido cu no ta di emergencia y cu no ta necesario mesora. Tambe ta haci un apelacion grandi riba cuidadanonan pa bay trankil den trafico y evita accidente. Pasobra cada victima di accidente den trafico ta tuma mas cama den hospital. CrisisTeam lo evalua ki paso mas mester tuma y ta haci un apelacion serio na tur cuidadano pa cuida nan mes y nan famia.
Fuentenan a sigura nos cu awe a manda tres pashent di Aruba pa Bucaramanga. Nan tabata interna den e unidad di cuido intensivo di Dr. Horacio E. Oduber Hospital. Ta manda e pashentnan aki di Covid pa Colombia pa por traha espacio pa otronan por drenta ICU. Pero, asina cu un sali, otro ta drenta su tras, cu ta haci dificil pa por maneha. Ta menciona cu tabatin pashent cu a yega asina malo awe na Spoedseisende Hulp, cu no por a haci nada y cu a muri eyden mes. No a logra haya confirmacion ainda di hospital riba e ultimo aki. “Pero e situacion aki den ta serio, e cos a bay fo’i man”, asina un nurse a confia nos mas trempan.
