Arestatie Team tabata e “wekker” pa habitantenan di dos cas na Sabana Basora pasa di 4or di marduga diabierna. Esaki tabata na momento cu a kibra porta na ambos adres buscando sospechosonan di e atraconan di ultimo simannan.
Atraco Team tabata lidera e investigacion y cu sosten di varios otro departamento a haci e entradanan hudicial na e adresnan menciona. Na e prome adres a haya e sospechoso principal. A pone na boei na man cu pia. Ora Arestatie Team a drenta esnan den e cas tabata bou di grito.
Djey bisiñanan tambe a lanta. Despues cu Arestatie Team tabatin tur cos bou di control, e otro teamnan cu ta haci e investigacion a drenta e casnan y cuminsa e listramento. Pafo autonan tambe a wordo listra completamente. Autoridad tabata busca evidencia pa e atraconan cometi y tambe arma di candela y cuchio usa den e atraco. E prome sospechoso a wordo hiba warda di San Nicolas.
E damita deteni den mesun adres a bay warda di Shaba. E otro tresnan deteni na e otro adres na Sabana Basora a bay warda di Santa Cruz. Un pabien na Atraco Team cu otro logro y cu sosten tambe di e demas Departamentonan di Polis cu marduga a subi caya pa haci e detencionnan na e dos diferente adres. E cosnan cu a confisca ta wordo investiga si nan ta procedente di robo.
